Mbi 116.6 mln lekë për regjistrin elektronik të ekspertëve të gjykatave – Hapet tenderi, kriteret e për t’u bërë pjesë e tij
Mbi 116.6 milionë lekë nga buxheti i shtetit janë vënë në dispozicion për ngritjen e regjistrit elektronik të ekspertëve që ushtrojnë aktivitetin pranë gjykatave. Agjencia Kombëtare e Shoqërisë së Informacionit (AKSHI) ka hapur procedurat e tenderimit, ku operatorët e interesuar do të kenë mundësi të dorëzojnë ofertat e tyre deri më 20 mars të këtij viti.
Ndërkohë, kohëzgjatja e kontratës është përcaktuar në total 51 muaj kalendarikë, ku 3 muaj janë parashikuar për implementimin dhe 48 muaj të tjerë për mirëmbajtje.
Ky regjistër elektronik është nën përgjegjësinë e Ministrisë së Drejtësisë, e cila ka tagrin ta krijojë, administrojë dhe ta vërë atë në dispozicion për publikun. Ai do të ndahet në seksione të ndryshme, duke grupuar ekspertët sipas fushave të ndryshme të ekspertizës dhe vendit ku ata punojnë. Për t’u bërë pjesë e këtij regjistri, ekspertët duhet të përmbushin një sërë kriteresh, të cilat përfshijnë:
a) të ketë dhjetë vjet përvojë profesionale në fushën specifike apo të ngjashme. Pesë vjet përvojë profesionale e këtij lloji është e mjaftueshme nëse aplikanti ka përfunduar një trajnim profesional në fushën përkatëse;
b) të ketë zotësi të plotë për të vepruar;
c) të jetë i regjistruar dhe të ketë përmbushur në mënyrë të rregullt detyrimet në organet tatimore.
Ndërkohë, regjistri elektronik parashikon një rubrikë të veçantë, ku palët e interesuara mund të vlerësojnë ekspertin në lidhje me ekspertizat e tij në të shkuarën, duke përdorur një sistem pikëzimi.
Ngritja e këtij regjistri është parë si një mekanizëm me rëndësi në kuadër të reformës në drejtësi dhe synon të rrisë cilësinë dhe transparencën e caktimit të ekspertëve në proceset gjyqësore.
Ekspertët do të vijojnë të thirren nga gjyqtarët por do të zgjidhen pikërisht nga ky regjistër elektronik i licencuar, proces i cili më herët funksiononte ndryshe, pasi ata thirreshin vetëm bazuar në listën e ekspertëve që dispononte gjykata.
Genta Dobra/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.