Mbi 120 mijë biznese pasive – Bilanci i vitit 2018, Tirana mban rekord

Vitit 2018 është mbyllur me mbi 120 mijë biznese pasive apo e thënë ndryshe, subjekte që nuk ushtrojnë aktivitet tregtar të paktën në mënyrë formale, një shifër kjo që ka ardhur ne rritje nga viti në vit.

Referuar të dhënave më të fundit të përditësuara më 3 Janar 2019, të regjistrit të Drejtorisë së Përgjithshme të Tatimeve, numri total i bizneseve pasive në këtë fillim viti rezulton të jetë 120 161 subjekte, të shpërndara në të gjithë vendin.

Duhet evidentuar fakti se kjo shifër nuk i përket vetëm vitit 2018 por është akumulim i viteve të mëparshme duke nisur që prej vitit 1991.

Tirana mban rekord sa i përket bizneseve që kanë kaluar në status pasiv, duke zënë 39.4 për qind të totalit, dhe më pas renditet Durrësi me 15.3 për qind. Ndërsa Drejtoria Rajonale Kukës zë peshën më të vogël me vetëm 1.03 për qind.

Një subjekt transferohet nga regjistri aktiv në regjistrin pasiv në rastet kur nuk ushtron më veprimtari tregtare për një periudhë tatimore prej 12 muajsh të njëpasnjëshëm; nuk dorëzon deklaratën tatimore për një periudhë tatimore prej 12 muajsh të njëpasnjëshëm apo deklaron në QKR pezullim veprimtarie tregtare për një periudhë më shumë se 12 muaj të njëpasnjëshëm apo pa afat të përcaktuar.

Elisabeta Dosku/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.