Mbi 26 mijë pensionistë të rinj në një vit – Më shumë meshkuj, pensioni mesatar 15 mijë lekë në muaj

Mbi 26 mijë pensionistë të rinj i janë shtuar skemës gjatë vitit 2019. Sipas të dhënave zyrtare të Institutit të Sigurimeve Shoqërore, në total janë lidhur 26,345 pensione të reja pleqërie vitin që lam pas. Numrin më të lartë të individëve që kanë mbushur moshën e pensionit e përbëjnë meshkujt me 14,260 pensione të reja, ndërsa gjinia femërore numëron 12,085. Sa i takon pagesës me të cilën trajtohen, masa masa mesatare mujore e pensioneve të reja regjistrohet në afro 14.841 lekë.

Ajo që vihet re është se meshkujt trajtohen me pensione më të larta se sa femrat, çka tregon dhe diferencat që kanë pasur në paga, pasi masa e pensionit llogaritet në raport me kontributin e dhënë, i cili është i lidhur drejtpërdrejtë me nivelin e pagës së deklaruar. Kështu pensioni mesatar mujor për burrat është 16,283 lekë, ndërsa për gratë 13,139 lekë. Mosha mesatare e daljes në pension për meshkujt është 65.1 vjeç ndërsa për femrat 61 vjeç. Aktualisht në të gjithë vendin trajtohen me pension pleqërie 529 mijë individë.

Elisabeta Dosku / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.