Mbi 4700 fëmijë në çerdhet publike – Më të mbingarkuarat në bllok dhe qendër, periferia më pak e preferuar
Çerdhet publike të kryeqytetit frekuentohen nga 4743 fëmijë të regjistruar. Të dhënat më të fundit të Bashkisë së Tiranës i përkasin muajit Gusht ku dhe kanë përfunduar regjistrimet e reja të fëmijëve për sezonin 2021-2022. Në total në të gjithë territorin e kryeqytetit janë 37 çerdhe publike që kujdesen për fëmijët nga 6 muaj deri në 3 vjeç, por cilat prej tyre janë më të mbingarkuara dhe ku ka më pak fëmijë të regjistruar?
Sipas të dhënave, duket se çerdhja me ngarkesën më të madhe është ajo nr.16, në zonën e Ish-bllokut me 305 fëmijë të regjistruar, e ndjekur nga çerdhja nr.1 në rrugën e barrikadave në afërsi të qendrës me 265 fëmijë, më pas renditet çerdhja nr. 17 në rrugën “Kongresi i Lushnjes” pranë 21 Dhjetorit, e ndjekur nga çerdhja nr.52 pranë tregut elektrik dhe më pas vijojnë çerdhet nr.33, 35 dhe 8, përkatësisht pranë Stadiumit Dinamo, pranë 21 Dhjetorit, dhe në rrugën Myslym Shyri.
Duket se çerdhet më të mbingarkuara janë të përqendruara në zonat më të populluara dhe kryesisht në afërsi të qendrës. Ndërsa çerdhet me më pak ngarkesë janë më në periferi të qytetit, si çerdhja tek Bregu i Lumit, Kodër Kamëz, Shkozë, në Qesarakë dhe Sauk. Ashtu si në kopshte, investimet e bashkisë janë përqendruar vitet e fundit edhe në rikonstruksionin e çerdheve, ku pjesa më e madhe e tyre aktualisht ofrojnë kushte maksimale për fëmijët, çka ka sjellë dhe rritje të kërkesës në regjistrime.
Çerdhet më të mbingarkuara
Çerdhja nr. 16 305 fëmijë
Çerdhja nr.1 265 fëmijë
Çerdhja nr. 17 231 fëmijë
Çerdhja nr. 52 208 fëmijë
Çerdhja nr. 33 201 fëmijë
Çerdhja nr.35 181 fëmijë
Çerdhja nr. 8 181 fëmijë
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.