“Mbi 50% e thirrjeve te 127, për COVID-19” – Brataj: Dominojnë moshat nën 50 vjeç, 90% e të shtruarve në spital janë të pavaksinuar
Ditët e para të vitit 2022 kanë shënuar një rritje të numrit të telefonatave në numrin e Urgjencës Kombëtare, 127, nga qytetarë që dyshojnë se janë prekur nga COVID-19. Kreu i urgjencës, Skënder Brataj thotë për TV SCAN se rreth 50% e thirrjeve bëhen pikërisht për këtë kategori, ndërsa bën me dije edhe të dhënat për referime tamponi apo shtrime në spital.
Sa I takon situatës epidemiologjike në vend, Brataj thotë se rritja e numrit të infektimeve ishte e pritshme për shkak të qarkullimit të variantit Omicron, ndërsa shton se ka një rritje të konsiderueshme të të rinjve, që po infektohen.
Po ashtu, kreu i Urgjencës Kombëtare, njëkohësisht anëtar i Komiteti Teknik të Ekspertëve thotë se në spitale ka shumë të shtruar të moshës nën 50 vjeç, teksa 90% e të shtruarve janë të pavaksinuar.
Brataj ripërsërit kërkesën për t’u vaksinuar, duke theksuar se vaksina është e vetmja formë që të mbron nga format e rënda të infeksionit.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.