Mbi 61 mijë biznese në Tiranë – Aktiviteti dhe zonat më të preferuara
Rreth 61.274 është numri total i subjekteve aktive që operojnë në kryeqytet aktualisht, ku 46.335 janë biznese kryesore dhe 14.939 subjekte sekondare.
Sipas të dhënave nga Drejtoria e Përgjithshme e Taksave dhe Tarifave për periudhën Janar-Mars 2018, sa i përket llojit të biznesit, duket se kryeson sërish “shitja me pakicë” ku vepron numri më i lartë i subjekteve si kryesore ashtu edhe dytësore, konkretisht 21.276 prej tyre.
Bëhet fjalë kryesisht për dyqane të vogla lagjeje, me produkte ushqimore apo veshjesh, etj. Kategoria e dytë në renditje janë njësitë e shërbimit, si hotelet, baret, restorantet, etj, që arrijnë në 16.726 subjekte në total.
Në renditje sipas numrit vijojnë subjekte të llojit “shitje me shumicë”, “njësi prodhimi”, “profesione të lira”, “subjekte ndërtimi”, “transport” etj. Ndërsa numrin më të ulët të subjekteve ekonomike në kryeqytet duket se e zënë ambulantët me vetëm 60 të tilla në të 24 njësitë administrative, dhe kjo ndodh për shkak se një pjesë e konsiderueshme e tyre funksionojnë të pa regjistruar.
Pas 11 njësive historike të kryeqytetit ku dhe është përqendruar numri më i lartë i bizneseve, duket se zona të reja po “lulëzojnë” dhe Kashari është njësia që udhëheq ish periferitë që tashmë janë bërë pjesë e Tiranës, ku funksionojnë plot 3527 biznese dhe më pas renditet Dajti, Farka, Vaqarri, etj.
Elisabeta Dosku/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.