Mbi një dekadë në opozitë – Kush është Albin Kurti, kryeministri i ri i Kosovës?

Komisioni Qendror i Zgjedhjeve ka përfunduar numërimin e votave për zgjedhjet e parakohshme parlamentare në Kosovë. Albin Kurti i VV është shpallur fitues  me 25.81% të votave dhe gëzon të drejtën e plotë të qeverisjes së Republikës së Kosovës.

Por kush është Albin Kurti ?

Albin Kurti lindi më 24 mars 1975 në Prishtinë. Mbas arsimimit bazë dhe më tej atij të mesëm në Prishtinë vazhdon studimet. Në rezistencë kundër Milosheviçit në gusht të vitit 1997 Albini u bë pjesë e Unionin e Pavarur të Studentëve të Universitetit të Prishtinës, si anëtar i kryesisë e më vonë si zyrtar për marrëdhënie ndërkombëtare.

Ai ishte njëri ndër udhëheqësit e protestës historike studentore më 1 tetor 1997 e cila u shtyp brutalisht nga policia e Milosheviçit.

Me fillimin e Luftës në Kosovë, në gusht të vitit 1998, Albini filloi punën në zyrën e përfaqësuesit të përgjithshëm politik të UÇK-së, Adem Demaçit, ku shërbeu si sekretar i zyrës. Gjatë bombardimeve të NATO-s ai qëndroi në Prishtinë deri më 27 prill 1999, kur policia serbe e arrestoi.

Me 10 qershor, me tërheqjen e forcave serbe në Serbi, ai së bashku me të burgosurit tjerë shqiptarë u transferua në burgjet serbe. Më 13 mars 2000 në Nish, Albini u dënua me 15 vjet burg të rëndë. Gjatë gjykimit ai refuzoi të njihte legjitimitetin e gjykatës.

Më 23 prill 2003 Albini u diplomua në fakultetin e shkencave kompjuterike dhe telekomunikacionit në Universitetin e Prishtinës dhe vazhdoi të jetë aktivist i të drejtave të njeriut dhe atyre civile.

Në qershor 2005, Albin Kurti themeloi lëvizjen Vetëvendosje, të cilën e drejtoi për 10 vite me radhë, ndërsa në krye të saj u rikthye në janar të 2018. Tre mandate deputeti në Kuvendin e Kosovës, por dhe qëndrimet e tij i kanë kushtuar jo pak Albin Kurtit.

Në vitin 2017 ai u arrestua bashkë me dy deputetë të tjerë pas përfundimit të një proteste të partive opozitare kundër marrëveshjeve me Serbinë dhe kundër asaj për shënimin e kufirit me Malin e Zi.

Me rikthimin e tij në krye të Vetëvendosjes, Kurti vijoi të kundërshtonte po aq shumë një marrëveshje të mundshme me Serbinë, në dëm të interesave të Kosovës, duke mos i kursyer sulmet në drejtim të qeverisë Haradinaj.

Me dorëheqjen e Haradinaj, Kurti doli menjëherë në një deklaratë për shtyp duke e komentuar si një vendim të vonuar. Kështu Albini kishte ndezur motorrët e garës dhe provoi fitoren pas 14 vitesh në opozitë.

Sot ai dha mesazhin si kryeministër i Kosovës, duke u shprehur se e presin shumë punë të vështira, që sipas tij i shtojnë vullnetin.

I përfshirë për më shumë se një dekadë në politikë, tani është koha që Kurti të provojë që nëpërmjet postit të kthehet në një shpresë për vendin.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.