Mbledhja e jashtëzakonshme e Qeverisë – Bilanci tragjik, Rama: Gjendje e jashtëzakonshme edhe në Laç, familjet nëpër hotele

Gjatë mbledhjes së jashtëzakonshme të Qeverisë Zhvilluar mëngjesin e së premtes, Kryeministri Edi Rama ka bërë një përmbledhje paraprake  të bilancit tragjik të dëmeve dhe viktimave të shkaktuara nga tërmeti i 26 nëntorit, duke shpallur gjendjen e jashtëzakonshme edhe në qytetin e Laçit, propozim i ardhur nga Kryetari i Partisë Demokratike Lulzim Basha.

Shefi i qeverisë theksoi se për pos vatrave të vështira në Durrës dhe në Thumanë, dëmtime të shumta të banesave ka pasur edhe në Tiranë. Sipas kryeministrit, edhe pse bilancet janë ende paraprake, në Tiranë rezultojnë 3480 qytetarë të cilët janë pastrehë dhe shumë banesa  e pallate të dëmtuara.

Kreu i qeverisë tha se do të mblidhet Komiteti kombëtar i ndërtimit për të gjithë këtë proces, ndërsa tha se do të ishte i lumtur që pjesë e këtij komuniteti të ishte edhe opozita, qoftë në aspektin financiar, qoftë edhe atë teknik.

Më tej Rama tha se të gjithë të mbeturit pa banesa nga tërmeti do akomodohen nëpër hotele dhe premtoi shtëpi të reja për banorët e Thumanës. Kreu i Qeverisë kërkoi gjithashtu të nisi mbledhja e informacioni për stokun e apartamenteve të pa shitura në Tiranë e Durrës.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.