Mbledhja e këshillit politik, Rama: “Ta çojmë deri në fund angazhimin e nënshkruar më 5 qershor”

Duhet të çojmë deri në fund edhe angazhimin e nënshkruar deri më 5 qershor. Kështu është shprehur kryeministri Edi Rama i cili ishte i pranishëm në mbledhjen e këshillit politik. Ndërsa lidhur me mungesën e kreut të PD, Lulzim Basha, Rama u shpreh se është shumë më e rëndësishme përmbajtja e çështjes sesa e delegacioneve.

Gazmend Bardhi, në emër të opozitës së bashkuar, u shpreh se dakordësia e 5 qershorit nuk do të ndryshojë.

“Sikur jeni në dijeni prej 6 muajsh, këshilli politik ka qenë në punë të vijueshme, në 5 qershor palët nënshkruan marrëveshjen dhe ne sot i kërkuam informacion kryetarit të PS-së për angazhimin e tij për miratimin pa ndryshime të paktit në Kuvend, nuk morëm përgjigje, se kur votohet pa ndryshime. Së dyti konfirmoj se i qëndrojmë marrëveshjes së 5 qershorit, nga ajo jo të gjitha palët morën gjithçka që kërkuan, por ishte konsensuale. Sot na u konfirmua se duhet të rihapim çështje që kemi rënë dakord në 5 qershor, por nuk mund të hedhim në kosh punën 6 mujore.”

Ndërsa Rudina Hajdari i bëri thirrje Lulzim Bashës që të pranojë marrëveshjen për listat e hapura. Sipas saj nuk duhet të humbet më kohë me ndryshimet kushtetuese, por ato të mbyllen deri më 30 korrik.

“Sot erdhëm për të diskutuar mbi ndryshime kushtetuese dhe opozita jashtëparlamentare  të kishte ardhur me një axhendë reflektuese. Listat e hapur i kërkojnë 85 % e shqiptarëve, por ajo që ndodhi ishte diskutimi mbi marrëveshjen e 5 qershorit dhe asnjë reflektim  për listat e hapura. Thirrje Bashës që të mos i rreshtojë demokratët në rresht me ata njerëz që duan listat të mbyllura, por në atë rresht që duan lista të hapura. Përndryshe do të kenë në anën e keqe të historisë , pasi kjo është një ndryshim thelbësor për shoqërinë dhe do të ndihmojnë opozitën për ndryshime thelbësore.” – u shpreh znj.Hajdari. 

Nertila Doko / SCAN 

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.