Mbledhja e qeverive Shqipëri-Mali i Zi, Rama: Ndjekim shembullin tuaj të turizmit. Nevojë për të rritur shkëmbimet dhe bashkëpunimin
Është zhvilluar në Shkodër mbledhja e radhës e përbashkët mes dy qeverive të Shqipërisë dhe Malit të Zi.
Fokusi i takimit qëndronte në forcimin e bashkëpunimit institucional mes dy vendeve në fushën e turizmit, energjisë, shkëmbimeve tregtare dhe kulturës. Rama vlerësoi modelin e turizmit të Malit të Zi dhe u shpreh se dëshiron që dy vendet të krijojnë një zonë të përbashkët turistike, çka do të rriste kapacitetet, sillte përfitime për të dy palët si dhe për turistët.
“Hapja e pikave të reja të kalimit kufitar përbën jo vetëm një sukses të përgatitur të këtij takimi, por edhe një bazë më të gjerë për të zhvilluar dhe duke vazhduar me vënien në pah dhe shfrytëzimin e vlerave të mëdha ekonomike dhe turistike që mban zona që bashkë ndajmë.
Duke ndjekur edhe shembullin tuaj të zhvillimit të turizmit dhe duke komunikuar me investitorë që tanimë janë të pranishëm në bregdetin tuaj, e kemi dëgjuar nga investitorët, nevojën për të zgjeruar investimet edhe në anën tonë të kufirit dhe për të ndërlidhur më shumë kapacitet qeveritare, bashkiake, ekonomike dhe natyrore të dy vendeve, në mënyrë që gjithë turistët që drejtohen duka pasur si pikë referimi Malin e Zi të përfitojnë duke pasur një zonë më të madhe”, u shpreh Rama.
Rama u ndal veçanërisht edhe tek nevoja për të rritur shkëmbimet tregtare, të cilat sipas kryeministrit shqiptar, në volumin aktual nuk pasqyrojnë afërsinë mes dy vendeve. Kjo sipas Ramës do të arrihet përmes incentivave lehtësuese duke hequr barrierat jotarifore për bizneset në të dyja anët.
Sa i takon projekteve të përbashkëta, Rama tha se të dy vendet po punojnë për realizmin e autostradës adriatiko-joniane dhe gazsjellësit IAP.
“Jemi në një proces intensiv lobimi për të mbështetur dhe mundësuar realizimin e gazsjellësit Adriatiko Jonian në mënyrë që Mali i Zi dhe Kroacia të përfitojnë drejtpërdrejt nga TAP dhe nga pikëpamja energjetike sovraniteti dhe kapacitetet rajonale të fuqizohen në mënyrë të ndjeshme”, u shpreh Rama.
Nga ana e tij, kryeministri malazez Duško Marković theksoi nevojën për të përfituar nga instrumentat dhe fondet e shtuara europiane për projekte që shtrihen në të dyja vendet. Ai vlerësoi edhe nismën për ngritjen e një qendre rajonale të fokusuar në shkencë dhe mjekësi, për të parandaluar largimin e talenteve.
A.H./SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.