Mblidhet grupi parlamentar i PS – Rama: Qeveria e re do të jetë më pranë shqetësimeve të qytetarëve

Kryeministri Edi Rama ka mbledhur grupin parlamentar të PS një ditë para se të nis zyrtarisht nga puna Kuvendi i zgjedhur më 25 qershor.” Rama II “ angazhohet që të sjell në parlament në 4 vjeçarin që vjen zërin e qytetarëve.

Sipas kryeministrit deputetët do të jenë në takime të vazhdueshme me qytetarët për të mësuar rreth problematikave reale që ata kanë.Kjo do të realizohet  nëpërmjet  disiplinës  që është kyçe për qeverinë dhe për grupin parlamentar, sipas Ramës.

“Puna e grupit fillon zyrtarisht nesër me seancën e parë të Kuvendit të Shqipërisë, por do të vazhdojë intensivisht jo vetëm në Kuvend, por edhe në terren ku skuadrat e deputetëve do të jene të pranishëm siç e kemi folur edhe më parë, për të vijuar komunikimin dhe ndërveprimin me zgjedhësit.

Është me shumë rëndësi që të nënvizohet se disiplina e grupit dhe e qeverisë janë faktorë kyç në këtë legjislaturë, ashtu si kundër janë edhe një shprehi elementare dhe e domosdoshme e vullnetit, por edhe në funksion të procesit të bashkëqeverisjes për të vendosur së bashku të gjithë planin e punës së bashkëqeverisjes në vijim.

Do ketë paraqitje para grupit të planeve për të gjitha ministritë, te cilat do të jenë në kohë edhe baza e kontratës së performancës së çdo ministri dhe baza ku deputetet do te monitorojnë punën e qeverisë në çdo caktim”.

Më 9 shtator pritet që të mblidhet Kuvendi për herë të parë në orën 10.00 e më pas do të ketë një mbledhje të dytë po në këtë ditë në orën 18.00, moment në të cilin do të betohen deputetët e rinj. Ndërsa në fillim të javës së ardhshme në Kuvend do të prezantohet qeveria e re.

Entela Barjamaj/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.