Mbretëria e Bashkuar do të ofrojë 3.3 milion euro në ndihmë të shtetasve britanikë në BE

Mbretëria e Bashkuar do të përgatisë masa të reja për të ndihmuar shtetasit britanik që jetojnë në Bashkimin Europian.

Financimi i fondeve deri në 3,3 milion euro do të vihet në dispozicion për organizatat vullnetare, të cilët do t’i informojnë njerëzit për nevojën për t’u regjistruar ose të aplikojnë për qëndrim, si dhe t’i mbështesin ata në plotësimin e kërkesave të tyre.

“Mbretëria e Bashkuar do të largohet nga BE në 31 tetor dhe ne duam të ndihmojmë shtetasit e Mbretërisë së Bashkuar që jetojnë në të gjithë BE të jenë plotësisht të gatshëm për Brexit, pavarësisht rrethanave. Ky financim do të sigurojë që njerëzit të marrin mbështetjen që duhet të aplikojnë për të mbrojtur të drejtat e tyre të qëndrimit dhe qasje në shërbime”, tha Sekretari i Jashtëm Dominic Raab.

Mbi 1 milion shtetas të Mbretërisë së Bashkuar aktualisht jetojnë në Bashkimit Europian.

Qeveria tha se dëshiron të mbështesë ata që mund ta kenë më të vështirë plotësimin e të gjitha dokumenteve për Brexit, duke u përqendruar në veçanti te pensionistët ose personat me aftësi të kufizuara, ata që jetojnë në zona të largëta ose me vështirësi lëvizshmërie, dhe ata që kanë nevojë për ndihmë me përkthimin ose interpretimin e gjuhës.

Nebi Xhomaqi / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.