Mbretëria qëndron në “këmbë”- Ekonomia përshpejtohet në T2, por sërish ka shqetësime

Ekonomia britanike ka fituar disi shpejtësi në tremujorin e dytë të vitit, tregojnë të dhënat e fundit, duke marrë shtysë kryesisht nga sektori i shërbimeve dhe boom-i në industrinë kinematografike.

Gjatë tremujorit të dytë të këtij viti, rritja ekonomike u përshpejtua në 0.3%, nga 0.2% në tremujorin e parë. Kjo e dhënë pritet të vulosë vendimin e radhës së Bankës së Anglisë, për të mbajtur të pandryshuara politikat monetare pranë rekordit minimal.

Të dhënat janë gjithashtu në linjë me pritshmëritë e tregjeve dhe analistëve. Paundi britanik humbi ndjeshëm terren kundrejt dollarit amerikan pas publikimit të këtyre të dhënave. Ekonomia britanike u rrit me 1.8% gjatë vitit të kaluar, duke u bërë ndër performueset më të mira mes 7 ekonomive më të mëdha të botës, duke hedhur poshtë çdo pretendim për një recesion pas votës pro daljes nga Bashkimi Europian në Qershor të 2016.

Gjithsesi, kjo votë ia doli të zhvlerësonte Paundin, duke nxitur ndjeshëm normën e inflacionit, çka përkthehet në tkurrje të të ardhurave të konsumatorëve. E gjitha kjo u reflektua në performancën e dobët të ekonomisë britanike gjatë gjysmës së parë të këtij viti.

Rritja prej 0.3% në tremujorin e dytë rezulton më e ulët se projeksionet e Bankës së Anglisë, që priste një normë rritje pranë 0.4%.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.