Mbreti rus i qymyrit dhe plehut: Lufta duhet të përfundojë, ose do të ketë një krizë globale ushqimore!

Lufta në Ukrainë është një tragjedi që duhet të ndalet ose do të ketë një krizë globale ushqimore, pasi çmimet e plehut në mbarë botën janë tashmë shumë të larta për shumë fermerë, tha të hënën mbreti rus i qymyrit dhe fertilizuesve, Andrei Melnichenko.

Disa nga biznesmenët më të pasur të Rusisë kanë bërë thirrje publike për paqe që kur Presidenti Vladimir Putin urdhëroi pushtimin më 24 shkurt, duke përfshirë Mikhail Fridman, Pyotr Aven dhe Oleg Deripaska.

Shtetet e Bashkuara dhe aleatët e tyre evropianë e cilësuan pushtimin e Putin si një rrëmbim toke të stilit perandorak që deri më tani është ekzekutuar keq, sepse Moska e nënvlerësoi rezistencën ukrainase dhe vendosmërinë perëndimore për të ndëshkuar Rusinë.

Perëndimi ka sanksionuar biznesmenët rusë, duke përfshirë sanksionet e Bashkimit Europian ndaj Melnichenkos, ngriu asetet shtetërore dhe ndërpreu pjesën më të madhe të sektorit të korporatave ruse nga ekonomia globale në një përpjekje për të detyruar Putin të ndryshojë kursin. Putin refuzon.

“Ngjarjet në Ukrainë janë vërtet tragjike. Ne kemi nevojë urgjente për paqe”, tha Melnichenko, 50 vjeç, i cili është rus, por ka lindur në Bjellorusi dhe ka një nënë ukrainase, për Reuters në një deklaratë të dërguar me email nga zëdhënësi i tij. “Si një rus nga kombësia, një bjellorus nga lindja dhe një ukrainas nga gjaku, ndjej dhimbje dhe mosbesim të madh duke parë se popujt vëllezër luftojnë dhe vdesin.”

“Një nga viktimat e kësaj krize do të jetë bujqësia dhe ushqimi,” tha Melnichenko, i cili themeloi Uralchem, prodhuesi më i madh i nitratit të amoniumit në Rusi, i cili është i bazuar në Zug, Zvicër, dhe SUEK, prodhuesi kryesor i qymyrit në Rusi. “Kjo tashmë ka çuar në rritjen e çmimeve të plehrave të cilat nuk janë më të përballueshme për fermerët.”

Melnichenko tha se një zinxhir furnizimi i ndërprerë tashmë nga Covid-19 tani ishte edhe më i shqetësuar. “Tani do të çojë në inflacion edhe më të lartë të ushqimit në Evropë dhe mungesë të mundshme ushqimore në vendet më të varfra të botës,” tha ai. RTS

Edel Strazimiri / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.