Mbrojtja e bimëve nga parazitët – Ministria e Bujqësisë, 430 mijë euro për të luftuar karkalecin
Ministria e Bujqësisë, Zhvillimit Rural dhe Administrimit te Ujërave ka shpallur kompaninë fituese, e cila do të ofrojë shërbimin për luftimin e karkalecave në të gjitha sipërfaqet e prekura në shkallë vendi.
Bashkimi i përkohshëm i kompanive “ARLI INTERNACIONAL” dhe “Genad Grup” është përzgjedhur fitues me vlerën 57.204.000 lekë, pasi ofertuesi tjetër është skualifikuar për mospërmbushje të një sërë kriteresh.
Tashmë kjo joint-venture, pas nënshkrimit të kontratës, do të bashkëpunojë me Drejtorinë e Bujqësisë lidhur me sipërfaqet që do të trajtohen dhe datat e kryerjes së shërbimit. Pas kryerjes së trajnimit, ajo do të marrë në dorëzim shërbimin nga grupi i punës së ngritur nga Drejtoria e Bujqësisë.
Shërbimi do të ekzekutohet brenda një afati 25 ditor dhe sipërfaqet që do të trajtohen, sipas kërkesave të Drejtorive të Bujqësisë përfshijnë :
Nr | DB | Sipërfaqet për trajtim në (ha) |
1 | Berat | 2000 |
2 | Dibër | 900 |
3 | Durrës | 1500 |
4 | Elbasan | 2500 |
5 | Fier | 1500 |
6 | Gjirokastër | 2000 |
7 | Korçë | 2000 |
8 | Kukës | 130 |
9 | Lezhë | 1600 |
10 | Lushnje | 3500 |
11 | Shkodër | 800 |
12 | Vlorë | 2000 |
Totali | 20 430 |
Njoftimi i fituesit është shpallur nga Ministria më 18 Korrik dhe është publikuar ditën e hënë, megjithëse afati i realizimit të programit, sipas dokumenteve të procedurës, është periudha Qershor-Korrik 2017.
Ministria e Bujqësisë pret që nga ky shërbim të reduktohet shkalla e infeksionit nga karkaleci në të gjitha sipërfaqet e kulturave bujqësore, kullotave dhe tokave djerrë pranë sipërfaqeve të kultivuara.
Përmes luftimit të këtij dëmtuesi, do të sigurohet prodhimi bujqësor dhe mbrojtja e kulturave.
Angelo Haruni/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.