“Mbushet” kufiri i Greqisë – Qeveria rrit kontrollet për të ndaluar mbi 10,000 emigrantë nga Turqia
Greqia vendosi të rrisë kontrollin në kufij në maksimum, ndërkohë që vendi përballet me rritje të refugjatëve që largohen nëpërmjet Turqisë. Këshilli i Sigurisë Kombëtare vendosi gjithashtu se Greqia nuk do të pranojë më aplikime të reja për azil nga njerëzit që hyjnë në mënyrë të jashtëligjshme për një muaj. Këshilli shtoi se refugjatët do të kthehen menjëherë në vendin e tyre të origjinës nëse është e mundur.
Greqia i kërkoi në mënyrë zyrtare agjencisë Frontex që të rrisë prezencën në rajon si dhe mbështetjen e plotë të Bashkimit Europian me masa konkrete. Kryeministri grek, Kyriakos Mitsotakis shkroi në Twitter se do të vizitojë kufirin tokësor të Evros në Veri, me Presidentin e Këshillit Europian, Charles Michel ditën e Martë. Qeveria greke kritikoi gjithashtu Turqinë për inkurajimin dhe drejtimin e emigrantëve drejt kufirit grek në ditët e fundit.
Më shumë se 13,000 njerëz janë mbledhur në kufirin tokësor mes Greqisë dhe Turqisë, sipas Organizatës Ndërkombëtare të Emigrantëve, pasi Turqia lajmëroi se autoritetet vendase nuk mund të parandalojnë më njerëzit drejt Europës. Ministria e Jashtme e Greqisë shkroi në Twitter se rreth 10,000 njerëz janë ndaluar të hyjnë në territorin grek brenda 24 orëve. Më shumë se 42,000 refugjatë ndodhen në 5 ishuj të Greqisë në godina të pritjes, që janë mbipopulluar në muajt e fundit.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.