Mbyllen 2552 biznese në Tiranë – Ndërsa u hapën mbi 7 mijë subjekte të reja në vitin 2017
Rreth 2552 biznese kryesore dhe dytësore janë mbyllur gjatë vitit që lamë pas në kryeqytet.
Konkretisht bëhet fjalë për subjekte të mbyllura, që kanë aplikuar për çregjistrim apo që kanë kaluar në status pasiv.
Sipas të dhënave të raportuara nga Drejtoria e Përgjithshme e Tatimeve dhe Taksave vendore, 1613 prej tyre janë biznese kryesore dhe 939 subjekte sekondare.
Ndër subjektet kryesore, pjesën më të madhe të mbylljeve e zë biznesi i vogël me 1513, ndërkohë që janë rreth 93 biznese të mëdha që kanë vendosur të mos operojnë më në treg.
Ndërsa raporti është i përmbysur sa i përket subjekteve sekondare, ku rezultojnë 485 biznese të mëdha të mbyllura dhe 185 biznese të vogla.
Ndërkohë po gjatë vitit që lamë pas në Tiranë janë hapur në total 6274 biznese të reja kryesore , nga të cilat 5881 janë biznese të vogla dhe 355 janë biznese të mëdha, ndërsa pjesa tjetër përfshihen në kategorinë të tjera.
Ndërsa janë rreth 1620 subjekte të reja sekondare të hapura gjatë vitit që lamë pas. Shifra e subjekteve të hapura tregon se pavarësisht se shumë biznese nuk ia kanë dalë të qëndrojnë në treg, kryeqyteti është tërheqës për veprimtari të reja ekonomike, dhe kryesisht të kategorive “shitje me pakicë” dhe “shërbime”.
Elisabeta Dosku/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.