Mbyllet java e 13-të e aksionit anti-infomalitet – Tatimet: Mblidhen mbi 3.1 mld lekë detyrime të prapambetura
Është përmbyllur java e trembëdhjetë e aksionit kundër informalitetit. Nga të dhënat e publikuara në faqen zyrtare të Drejtorisë së Përgjithshme, rezulton se është mundësuar përfundimi i 19 877 kontrolleve.
Dominuese vijojnë të mbeten kontrollet nga zyra, që përbëjnë edhe 72.3 për qind të totalit, ndjekur nga vizitat fiskale dhe verifikimet në terren .
Ndërkohë, lidhur me subjektet të cilat kanë ndryshuar përgjegjësinë tatimore, nga raporti janë evidentuar 1 724 të tilla. Sa i përket verifikimeve në territor, nga të dhënat e DPT-së rezulton se janë verifikuar 28 169 subjekte, ku 18.7 për qind e tyre kanë rezultuar në shkelje dhe janë penalizuar.
Gjatë këtyre trembëdhjetë javëve në skemën e sigurimeve janë futur 1030 punonjës, janë mbyllur 573 subjekte si dhe janë regjistruar 5 585 biznese të reja.
Ndërkohë, procesi i mbledhjes së detyrimeve të prapambetura ka vijuar dhe nga të dhënat 3701 subjekte kanë reaguar pozitivisht dhe vlera ka arritur në 3 miliardë e 183 milionë lekë.
Po ashtu, vazhdon edhe procesi i fshirjes së detyrimeve të prapambetura për periudhën para vitit 2010 dhe atë 20111-2014. Sipas të dhënave të DPT, shuma e detyrimit të falur ka arritur vlerën e 23 768 miliardë lekë dhe përdorimi i kredisë për shlyerjen e detyrimeve është 3 608 miliardë lekë.
Gjatë trembëdhjetë javëve të aksionit Shërbimi i Tatimpaguesve ka asistuar ballë për ballë në 82 755 tatimpagues, ndërkohë që numri i atyre që janë kontaktuar për ligjin e faljeve është 13 864. Sa i përket tatimpaguesve të kontaktuar për të nxitur vetëkorrigjimin rezultojnë të jenë 35 165 .
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.