Mbyllja e programit me FMN, Ahmetaj para gazetarëve: Pas zgjedhjeve, program i ri! Sfidë mirëadministrimi e mirëplanifikimi i investimeve

Mbyllja e programit me FMN, Ahmetaj para gazetarëve: Pas zgjedhjeve, program i ri! Sfidë mirëadministrimi e mirëplanifikimi i investimeve. Në mbyllje të programit 3 vjeçar me Fondin Monetar Ndërkombëtar për konsolidimin fiskal, ministri i Financave Arben Ahmetaj ka dalë para gazetarëve për të bërë bilancin e për të konfirmuar ecurinë e marrëdhënies me institucionin financiar ndërkombëtar. Ahmetaj tha se është miratuar marrëdhënia e re me FMN-në dhe se pas zgjedhjeve do të ketë një program të ri.

Aktualisht FMN është në rolin e monitoruesit të ecurisë së zbatimit të rekomandimeve. Në vijim të fjalës së tij, Ahmetaj tha se falë suksesit të arritur me programin e konsolidimit fiskal dhe realizimit të reformave u bë e mundur rritja e pagave dhe pensioneve. Më tej, ai evidentoi përmirësimin e klimës së biznesit dhe rritjen e eksporteve. Sa i përket vitit 2017, ministri i Financave rikonfirmoi se do të ulet borxhi publik dhe do të vijohet me konsolidimin fiskal dhe me zbatimin e ligjit të buxhetit. Duke evidentuar impaktin që ka tensioni politik te ekonomia e vendit, Ahmetaj tha se një nga sfidat është mirëadministrimi i investimeve dhe mirëplanifikimi i tyre.

Pak ditë më parë, Bordi i Fondit Monetar Ndërkombëtar ka mbyllur edhe rishikimin përfundimtar të programit me Shqipërinë, çka përkthehet në disbursimin e 73.2 milionë eurove nga qeveria shqiptare, duke e çuar huanë me institucionin në 377.3 milionë euro.

Marrëveshja tre vjeçare me Fondin Monetar Ndërkombëtar merr kështu fund zyrtarisht. Institucioni bën edhe bilancin e ekonomisë shqiptare, të paktën sa i përket sektorëve ku ishte fokusuar edhe marrëveshja me qeverinë. Në terma të përgjithshëm, institucioni flet me superlativa për ekonominë shqiptare, por nënvizon se, pa vazhdimësinë e axhendës së reformave, ky progres do të rezultojë i kotë.

Violeta Shqalsi/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.