Mbyllja e Qeverisë në SHBA – Pritet të vazhdojë deri në Janar. Amerikanët fajësojnë Trump
Amerikanët po fajësojnë presidentin Donald Trump për mbylljen e pjesshme të Qeverisë së SHBA, sipas një sondazhi të Reuters, ndërkohë që mbyllja u zgjat në ditën e 6 dhe nuk dihet se sa do të vazhdojë.
Sipas sondazhit të zhvilluar më 21-25 Dhjetor, 47% e personave fajësojnë Trump, 33% mbajnë të përgjegjshëm demokratët në Kongres, ndërsa vetëm 7% e amerikanëve fajësojnë republikanët.
Mbyllja e Qeverisë erdhi prej kërkesave të Trump që të përdorë para të taksapaguesve në 5 miliardë dollarë që të ndërtohet muri, kërkesë që u kundërshtua nga demokratët e madje edhe nga republikanët e tij.
Muri që do të ngrihet në kufirin me Meksikën, vlerësohet se do të arrijë një kosto totale prej 23 miliardë dollarë. Vetëm 35% e të anketuarve thanë se e mbështesin idenë e murit. Të dyja dhomat në Kongres u mblodhën ditën e Enjte, por duke mos treguar fare nxitim, nuk ndërmorën ndonjë vendim për të nisur funksionin e agjencive federale.
Mosreagimi në Kongres bëri që mbyllja e Qeverisë, me shumë gjasa, të zgjasë deri në javën e ardhshme dhe të vazhdojë deri në Janar. Ndërkohë që impakti është limituar deri më tani, për shkak të sezonit të pushimeve për 800,000 punonjësit federalë, kjo pritet të ndryshojë.
Agjencitë qeveritare nisën të njoftojnë publikun ditën e Enjte për ndërprerjet e shërbimeve. Agjencia Federale e Manaxhimit të Emergjencave bëri të ditur se nuk mund të procesojë policat e reja të sigurimit për përmbytjet, gjë që mund të ndërpresë shitjet e shtëpive. Konflikti për murin përkoi me skadimin e financimit për 20% të agjencive qeveritare.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.