Mbyllja e Qeverisë së SHBA – Kongresi, i ndarë mbi financimin e murit në kufi me Meksikën
Kongresi i 116 i Shteteve të Bashkuara u mblodh këtë javë, me demokratët që morën nën kontroll Shtëpinë e Përfaqësuesve dhe Republikanët që ruajtën shumicën në Senat, një situatë që do të sjellë përplasje të reja politike.
Ndërkohë që të dy partitë dështuan të arrijnë në dakordësi për buxhetin prej kërkesave të Donald Trump për të financuar murin me Meksikën, mbyllja e pjesshme e qeverisë që nisi më 21 Dhjetor do të vazhdojë.
Mbyllja ndikoi 9 departamente të kabinetit dhe dhjetëra agjenci, përfshirë sigurinë brenda vendit, transportin, departamentin e brendshëm, bujqësinë, drejtësinë si dhe parqet kombëtare.
Kjo detyroi gjithashtu 800,000 punonjës federalë që të punojnë pa marrë pagën. Shtëpia e përfaqësuesve pritej të votonte në paketën e re të financimit ditën e Enjte për të rinisur funksionin e agjencive federale.
Demokratët thanë se paketa e re do të përjashtojë kërkesën e Donald Trump prej 5 miliardë dollarë për ndërtimin e murit në kufirin me Meksikën.
Trump do të zhvillojë një mbledhje këtë fundjavë në Shtëpinë e Bardhë, ku do të marrin pjesë liderët e të dy partive, për të diskutuar buxhetin dhe mbylljen e qeverisë.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.