Me armë dhe kapele nëpër marketet e Tiranës- Policia arreston autorin
Policia e Shtetit ka finalizuar operacionin “Maskimi”, ku mbeti i arrestuar shtetasi me iniciale E.B, 27 vjeç.
Ky i fundit vidhte me armë markete dhe pika rimbushje telefonike në Tiranë. Shtetasi E.B, nën kërcënimin me armë zjarri pistoletë dyshohet të ketë kryer më shumë se një vjedhje në pika të ndryshme të Tiranës, për të cilat ka edhe pamje filmike.
Disa nga pikat në të cilat E.B ka kryer vjedhjet dyshohet të jenë një market në rrugën “Naim Frashëri”, një pike rimbushje telefonike në rrugën e Durrësit, si dhe një pikë dhënie kredie në zonën e Zogut të Zi.
Gjatë arrestimit, Policia sekuestroi në cilësinë e provës materiale një armë zjarri pistoletë si dhe rrobat që kishte përdorur në realizmin e vjedhjeve të kryera, së bashku me kapelen.
Materialet procedurale iu referuan Prokurorisë pranë Gjykatës Shkallës Parë Tiranë për veprime të mëtejshme për veprën penale “Vjedhja me armë”.
Jenida Vladi/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.