Më pak fonde për artin dhe kulturën. Financimi në buxhetin e vitit 2021, më i ulët për trashëgiminë kulturore
Financimi për artin dhe kulturën në vitin e ardhshëm mbetet sërish i ulët. Sipas buxhetit të vitit 2021 shuma totale e fondeve të parashikuar për këto institucione llogaritet në shumën e 2,2 miliardë lekësh, nga 2,256 miliardë që ishte në vitin 2020. Sipas buxhetit pjesa më e madhe e këtyre fondeve do të shpenzohet për financimin e institucioneve të artit dhe kulturës me 1.5 mld lekë, 533 milion lekë do të shpenzohen për trashëgiminë kulturore dhe muzetë ndërsa 160 mln lekë do të shkojnë për planifikim, manaxhim dhe administrim në këtë sektor.
Ajo që vihet re në buxhet është rënia e financimit për trashëgiminë kulturore krahasuar me buxhetin e një viti më parë. Për 2021 janë parashikuar të shpenzohen për trashëgiminë kulturore dhe muzetë 533 milion lekë nga rreth 600 milion lekë që ishin në vitin 2020. ulja e fondeve për vitin e ardhshëm i kufizon institucionet e artit dhe kulturës të cilat sërish nuk do të kenë shumë mundësi financiare për të zhvilluar jetën artistike në vend pavarësisht kërkesave të vazhdueshme nga ana e artistëve për të rikthyer vëmendjen tek arti dhe kultura.
Nertila Doko / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.