Më pak prodhim gruri në BE! Por, eksportet do të jenë në nivele rekord
Komisioni Europian uli parashikimin për prodhimin e grurit të Bashkimit Europian për sezonin 2022/23, por ruajti parashikimin për eksporte rekord pasi lufta ka ndërprerë furnizimin nga Ukraina.
Në vlerësimet mujore të ofertës dhe kërkesës për drithra, Komisioni uli perspektivën për prodhimin e grurit të zakonshëm, ose atij të butë, në sezonin korrik 2022 deri në qershor 2023 në 130.1 milionë ton, nga 131.3 milionë ton më parë. Parashikimi i ri, të cilin Komisioni ia atribuoi rishikimeve për Francën dhe Suedinë, ishte pothuajse i barabartë me prodhimin e vitit 2021/22 prej 130.0 milionë ton.
Pushtimi nga Rusia ka bllokuar eksportet masive të Ukrainës, duke çuar në çmime rekord të grurit dhe farave vajore. Komisioni mbajti parashikimin e tij për eksportet e grurit të butë të BE-së në 2022/23 në 40 milionë ton, që do të ishte një nivel më i lartë i të gjitha kohërave për bllokun. Pas një rishikimi në rritje të ofertës së pritshme këtë sezon, Komisioni rriti projeksionin e rezervave të grurit të butë të BE-së deri në fund të 2022/23.
Duke reflektuar gjithashtu ofertën e reduktuar nga Ukraina, Komisioni mbajti pritshmëritë për një rënie të madhe të importeve të misrit në 9 milionë ton, nga 14 milionë në periudhën 2021/2022.
Për importet e vajit të lulediellit, shumica e të cilave zakonisht vijnë nga Ukraina, Komisioni e rriti vlerësimin e tij për 2021/22 në 1.9 milionë, nga 1.5 milionë ton, por e shkurtoi parashikimin e tij për 2022/23.
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.