Më pak se 130 lekë rritje për invalidët – Rishikohen pagesat mujore, ndryshimet në fuqi nga 1 shtatori!
Pagesat mujore të personave më aftësi të kufizuar do të rriten nga data 1 shtator 2019, por diferenca e përfituar nuk i kalon 130 lekët në muaj. Referuar udhëzimeve të fundit, të nxjerrë nga ministrja e Shëndetësisë dhe Mbrojtjes Sociale, Ogerta Manastirliu, masa e përfitimit për personat paraplegjikë dhe tetraplegjikë, nga muaji që vjen do të jetë 10.653 lekë, apo thënë ndryshe 113 lekë më shumë se përfitimi aktual.
Ndërkohë që, kujdestarët e tyre do të marrin një rritje prej 120 lekësh, duke bërë që pagesa e tyre të shkojë në 11070 lekë. Në të njëjtat nivele do të përfitojnë edhe personat me aftësi të kufizuar në shikim, ku rritja e pagesës kap vlerën e 127 lekëve në muaj. Kështu, si të verbrit, ashtu dhe kujdestari i tyre nga shtatori do të marrin 12.092 lekë, nga 11965 lekë që marrin deri më tani.
Ndryshimi i pagesave të paaftësisë është një procedurë e përvitshme që përcaktohet me udhëzim ministri, që më tepër se rritje mund të konsiderohet një indeksim me inflacionin. Pak javë më parë u miratua edhe ligji “Për asistencën sociale, i çili ndër të tjera përcakton se në Programin e pagesave për personat me aftësi të kufizuara do të përfshihen edhe individët që deri më tani përjashtoheshin nga skema për shkak të mungesës së sigurimeve gjatë pesë viteve të fundit.
Gjithashtu, ligji i ri për asistencën sociale parashikon heqjen e tavanit të periudhës 48 mujore të përfitimit të pagesës së aftësisë së kufizuar për ata persona me aftësi të kufizuar të cilët janë në punë, duke e dhënë këtë pagesë për gjithë jetën.
TABELA
MASA E PËRFITIMIT PËR PERSONAT ME AFTËSI TË KUFIZUAR
PARAPLEGJIKË E TETRAPLEGJIKË
ISHTE 10 540 lekë
BËHET 10 653 lekë
RRITJA 113 lekë
KUJDESTARËT
ISHTE 11.070 lekë
BËHET 11.190 lekë
RRITJA 120 lekë
TË VERBËRIT DHE KUJDESTARËT
ISHTE 11.965 lekë
BËHET 12.092 lekë
RRITJA 127 LEKË
Ola Mitre/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.