Me risk të ulët për pastrim parash – Përjashtohen nga lista e rrezikut pensionet private, kompanitë publike, sigurimet e jetës
Një seri subjektesh financiare që nisin nga kompanitë e sigurimit të jetës, skemat e pensionit, apo kompanitë publike janë përjashtuar nga rreziku i pastrimit të parave. Përmes një vendimi të miratuar më 10 qershor, Këshilli i Ministrave ka përcaktuar faktorët tregues të situatave me risk të ulët të pastrimit të parave dhe të financimit të terrorizmit, për të cilat mund të zbatohet vigjilenca e thjeshtuar.
Me risk të ulët do të konsiderohen tashmë kompanitë publike të listuara në tregje titujsh dhe që u nënshtrohen rregullave të transparencës (sipas rregullave të tregut të titujve apo nëpërmjet ligjit apo të mjeteve të tjera të detyrueshme), që vendosin rregulla për transparencën e pronarëve përfitues; ndërmarrjet apo administratat publike.
Po ashtu me risk të ulët do konsiderohen edhe policat e sigurimit të jetës me prim të ulët; apo policat e sigurimit në skemat e pensionit pa mundësi përfitimi të parakohshëm dhe polica nuk mund të përdoret si kolateral.
Në listë përfshihen edhe skemat e pensionit të zakonshëm, të pensionit suplementar apo të përfitimeve të tjera të ngjashme, të cilat sigurojnë përfitime për punonjësit pas daljes në pension, kur kontributet zbriten nga paga dhe rregullat e skemës së pensionit nuk lejojnë transferimin e së drejtës; ashtu si edhe shërbime apo produkte financiare, të cilat sigurojnë shërbime të kufizuara dhe të përcaktuara shprehimisht për kategori të caktuara klientësh, me qëllim përfshirjeje financiare.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.