Më shumë fonde IPA – PE kërkon 56 milionë euro shtesë për rajonin

Shqipëria dhe 5 vendet e tjera të Ballkanit Perëndimor do të marrin më shumë para nga Brukseli vitin e ardhshëm. Parlamenti Europian ka votuar kështu një buxhet më të lartë se kërkesa e Komisionit Europian, në total 717 milionë euro më shumë. Dhe nga kjo shumë, rreth 56.3 milionë euro do të jetë shtesa për vendet e Ballkanit Perëndimor.

Shtesa do të shkojë për fondet IPA, instrumenti unik i Bashkimit Europian për të ndihmuar financiarisht Ballkanin Perëndimor dhe vendet e tjera në proces negociatash për anëtarësim. Buxheti për rajonin është rritur si pasojë e sfidave më të mëdha me të cilat përballet rajoni në drejtim të flukseve migratore.

Shqipëria por edhe disa vende të tjera të Ballkanit Perëndimor janë përfshirë këtë vit nga një fluks i paprecedentë refugjatësh, të cilët kanë gjetur një rrugë alternative drejt Europës perëndimore. Komiteti i buxhetit në Parlamentin Europian ka rishikuar projekt-buxhetin e Komisionit Europian edhe në drejtime të tjera, si programi ndaj të rinjve, siguria apo ndihma ndaj vende të tjera, edhe përtej kontinentit të vjetër.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.