Më shumë fonde për arsimin profesional, Opre: “Mbi 3 mld lekë për cilësinë dhe programin e punësimit”

Buxheti i vitit të ardhshëm për arsimin profesional, parashikon një rritje të fondeve  me 14%  me fokus rritjen e cilësisë  dhe programin  e punësimit.  Gjatë raportimit në komisionin  e punës,  çështjeve sociale dhe shëndetësinë, Drejtori i Analizës dhe Programit Buxhetor pranë Ministrisë së Financave,  Gentian Opre bëri të ditur se fondi për vitin e ardhshëm është në rritje dhe kap shifrën mbi  3 mld lekë .

“Në vitin 2021 ky fond shkon në vlerën e 3 mld e 295 mln lekë pra me një rritje prej 4.1% më shumë se viti i kaluar. Rritja e numrit të nxënësve në shkollat e mesme profesionale në 19.8% të totalit të nxënësve që ndjekin arsimin parauniversitar në vitin 2023 krahasuar me 175 në vitin 2020.”

Ndërkohë Mirela Bimo, drejtoreshë e buxhetit dhe manaxhimit financiar pranë Ministrisë së Arsimit , u ndal te  buxheti për programin e zhvillimit të sportit dhe rinisë. Sipas Bimos fondet për rininë janë rritur me 50% krahasuar me një vit më parë .

”Buxheti i Rinisë dhe Sportit në vitin 2021 ka një rritje me 1.9 herë ose është gati i dyfishuar krahasuar me buxhetin e rishikuar të vitti 2020 ose ka një rritje prej 475 mln lekësh. Gjithashtu rritje të konsiderueshme kanë pësuar shpenzimet kapitale për grupin për objektet infrastrukturore të sportit, por edhe ato të rinisë.  ”

Drejtoresha e buxhetit dhe manaxhimit financiar pranë Ministrisë së Arsimit u ndal të mbështetja me fonde të  federatave sportive, kryesisht  ato qe kane karakter olimpik me një fond i cili arrin deri në 65 milion lekë.

Nertila Doko / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.