Më shumë gjalp e më pak djathë – Shifrat e INSTAT për nënproduktet e qumështit në vitin 2018!

Sasia e prodhuar e gjalpit ka ndjerë një rritje me 3.22 % në vitin 2018, sipas publikimit të fundit të Instat për qumështin dhe nënproduktet e tij.

Nga ana tjetër, sasia e prodhuar e djathit sipas llojit të qumështit ka pësuar një rënie me 0.9 % në vitin 2018, krahasuar me vitin 2017. Djathi i butë dhe djathi gjysëm i fortë janë prodhuar më pak.

Në vitin 2018, sasia e djathit të butë të prodhuar ka qenë 7.765 ton, ndërsa në vitin 2017, kjo shifër ka qenë 8.256 ton. Po njësoj, sasia e prodhimit të djathit gjysëm të fortë në vitin 2018 shënohet 3.852 ton, kurse në vitin 2017 ka qenë 4.094 ton.

Nga ana tjetër, djathi i fortë është prodhuar më shumë në 2018- ën se në dy vitet paraardhëse. Sipas  Instat, sasia e djathit të fortë të prodhuar në vitin 2018 ka qenë 1.352 ton.

Kurse gjalpi, ai tradicional është prodhuar më shumë në vitin 2018. Nga 878 ton në 2017-ën, u prodhua 906 ton në 2018-ën.

Ndërsa sasia e  gjalpit të shkrirë, në vitin e kaluar ka qenë 8 ton, 2 ton më pak se në vitin 2017.

Jenida Vladi/ SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.