Më shumë gra në tregun e punës/ Denaj nënshkruan marrëveshjen prej 9.1 mln euro me BB
Rreth 9.1 milionë euro do të përdoren në vendin tonë në funksion të ndërmarrjes së politikave për zhvillim për rritjen e pjesëmarrjes së gruas në tregun e punës dhe kapitalit. Ministrja e Financave dhe Ekonomisë, Anila Denaj nënshkroi në Vjenë, marrëveshjen me Bankën Botërore për programin e barazisë gjinore dhe aksesin e grave në ekonomi.
“Nëpërmjet kësaj marrëveshje synojmë intensifikimin e politikëbërjes dhe instrumentave për të mundësuar aksesin e gruas në tregun e punës dhe në tregjet financiare, si një forcë shumë e rëndësishme për të zhvilluar ekonominë, për të zhvilluar sipërmarrjen dhe për të rritur Produktin e Brendshëm Bruto për frymë”, u shpreh Ministrja Denaj pas nënshkrimit të Marrëveshjes me BB.
Banka Botërore vlerëson se Shqipëria humb çdo vit 20 për qind të PBB-së së saj për frymë për shkak të shkallës së ulët të pjesëmarrjes së femrave në forcat e punës, mbipërfaqësimit të grave në sektorë të keqpaguar dhe hendekun e pagave mesatare për gratë dhe burrat në pozicione të ngjashme. Sipas Denaj, barazi në tregun e punës është e domosdoshme.
“Me mbështetjen e Bankës Botërore, Shqipëria ka ecur përpara në shumë reforma dhe besojmë se kjo do të jetë një reformë e suksesshme. E kemi nisur mbarë dhe besojmë që kemi akoma shumë për të bërë, por politikëbërja në këtë drejtim është kyç për një sukses të gjithë reformës në vijim”, tha Ministrja.
Programi synon ndërmarrjen e politikave me qëlli rritjen e aksesit të grave në pasuri; vendosjen e rregullave të barabarta të lojës për rritjen e mundësive për gratë në tregun e punës; dhe forcimi i rregullave institutionale për një politikëbërje të informuar gjinore.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.