Më shumë tapeta dhe perde më të renda…Disa këshilla si mund të ngrohni shtëpinë ”pa rënduar” faturat!

Edhe pse deri më tani ka qenë një dimër i butë, sërish temperaturat e ulëta kanë filluar të ndjehen, jo vetëm jashtë por dhe në ambientet e shtëpisë. Dhe për ata që jetojnë në rajone me mot më të ftohtë, rënia e temperaturave mund të nënkuptojë një rritje të shpenzimeve për ngrohjen gjatë muajve të ardhshëm. Më poshtë ju vijmë në ndihmë, nëpërmjet disa këshillave të thjeshta se si mund ta mbani shtëpinë tuaj të ngrohtë pa rënduar shumë buxhetin tuaj.

1. Varni perde të rënda, të qëndrueshme në dritare.

Perdet e holla, me ngjyra të lehta që përdorni gjatë muajve të verës, nuk janë të përshtatshme për  shtëpinë tuaj kur temperaturat fillojnë të bien. Ndaj për stinën e dimrit, këshillohen perde të rënda, të cilat ndihmojnë që të mbani ambientin e shtëpisë të ngrohtë.

2. Mbajini perdet e hapura gjatë kohës që del dielli

Sigurisht, që edhe gjatë dimrit duhet të përfitojmë nga ngrohësi natyral më efektiv: dielli!

Ndaj gjatë kohës që del dielli, përpiquni të hapni perdet duke e lejuar diellin të depërtojë brenda shtëpisë. Por, mos harroni t’i mbyllni sërish ato kur perëndon dielli si dhe gjatë natës. Në këtë mënyrë, do ruani ngrohtësinë e dhomave dhe do mbroheni nga i ftohti që mund të vijë nga jashtë shtëpisë.

4. Konsideroni të përdorni kondicionerin ‘inteligjent’

Kondicioneri, është zgjidhja ideale kur bëhet fjalë për mbajtjen ngrohtë të shtëpisë tuaj gjatë dimrit. Sipas ekspertëve, rekomandohet instalimi i një kondicioneri ‘’inteligjent’’, i cili është i programueshëm, dhe ju lejon të gradoni kohën kur ai duhet të ndizet, siç mund të jetë koha pak para se të zgjoheni dhe para se të ktheheni në shtëpi.

5. Dhe shmangni ndryshimin e temperaturës me më shumë se 10 gradë.

Të vendosni kondicionerin në punë duke e graduar atë maksimalisht, nuk nënkupton domosdoshmërisht se do ta ngrohë shtëpinë tuaj më shpejt. Këto luhatje ekstreme të temperaturës e bëjnë kondicionerin tuaj të funksionojë më shumë sesa duhet dhe të rrisë faturat tuaja të energjisë. Nisur nga kjo, këshillohet që të vendosni një temperaturë optimale në dhomë dhe mos e ndryshoni atë në mënyrë drastike.

6. Përdorni sa më shumë tapeta

Mbajtja e këmbëve ngrohtë gjatë dimrit, është gjysma e punës dhe nisur nga kjo duhet të keni parasysh që të kujdeseni për çdo sipërfaqe të shtëpisë tuaj e cila është e ‘’zbuluar’’. Jo vetëm që do t’ju ndihmojnë të mbani këmbët e ngrohta, por tapetat gjithashtu izolojnë më mirë shtëpinë tuaj.

7. Kujdesuni që dritaret tuaja të jenë të izoluara siç duhet

Sigurisht, që dritaret janë kyçi përsa i përket të mbajturit ambientin e shtëpisë sa më të ngrohtë, dhe nëse ato nuk janë hermetike atëherë do të fusin brenda të gjithë të ftohtin që bën jashtë. Por dhe në rastin, kur dritaret tuaja janë të vjetra, dhe fusin erë nga jashtë, mund të merrni në konsideratë mbështjelljen e tyre nga brenda me letër plastike, për të siguruar një shtresë shtesë izolimi sa më të mirë për të mbajtur ajrin e ftohtë jashtë.

Elefteria Zguri/ SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.