Më të rrezikuarit nga ndryshimet klimatike – Sipas Indeksit Global të Rrezikut të Klimës 2021, Puerto Riko dhe Mianmari në krye të listës

Ndërsa liderët botërorë përgatiten të takohen në Glasgow për COP26 të hënën e 1 nëntorit që të diskutojnë përgjigjen e tyre ndaj ndryshimeve klimatike dhe ndikimet e tij, indeksi vjetor i rrezikut klimatik 2021 tregoi se stuhitë më të fuqishme po godasin më rëndë njerëzit dhe ekonomitë, ndërsa me të varfrit vuajnë më rëndë pasojat.

Indeksi Global i Rrezikut të Klimës 2021, hartuar nga grupi kërkimor Germanwatch, tregoi Puerto Rikon dhe Mianmarin si më të prekurit nga ngjarjet ekstreme të motit nga viti 2000 deri në 2019, të ndjekur nga Haiti, Filipinet, Mozambiku, Bahamas, Bangladeshi, Pakistani, Tajlanda dhe Nepali.

Mozambiku dhe Zimbabve u renditën në krye të tabelës si më të goditurat nga moti ekstrem për vitin 2019. Të dyja u goditën nga Idai, cikloni më vdekjeprurës i regjistruar në Oqeanin Indian jugperëndimor. Stuhitë dhe efektet e tyre, erërat e forta, reshjet e dendura, përmbytjet dhe rrëshqitjet e dheut, ishin shkaku kryesor i dëmeve ekstreme të motit në vitin 2019, tha Germanwatch. Nga 10 vendet më të prekura, gjashtë u goditën nga ciklonet tropikale.

Shteti ishull i Karaibeve, Bahamas, ishte gjithashtu në këto 10 vende për shkak të shkatërrimit nga uragani Dorian. Shtetet e Bashkuara nuk u përfshinë në indeksin e 2019-ës për shkak të problemeve të të dhënave.

Hulumtimet e fundit sugjerojnë se ashpërsia dhe numri i cikloneve të forta tropikale do të rritet me çdo të dhjetën e shkallës në rritjen mesatare të temperaturës globale, tha Germanwatch. Në vitin 2020, një nga tre vitet më të nxehta të regjistruara, temperatura mesatare globale ishte rreth 1.2 gradë Celsius mbi periudhën para-industriale, sipas Organizatës Botërore Meteorologjike.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.