Media gjermane artikull për shqiptarin e suksesshëm në Berlin: Dikur kamarier, sot pronar i një restoranti italian me “rrënjë” shqiptare
Gazeta prestigjioze gjermane “Süddeutsche Zeitung” botoi gjatë kësaj jave një artikull kushtuar shqiptarëve të suksesshëm në Gjermani, rrugëtimit dhe sfidave të tyre deri në arritjen e suksesit.
Artikulli që vjen në formën e një profili, evidenton punën e Fatos Xhafollit, pronarit shqiptar të disa restoranteve me kuzhinë italiane në Berlin, të vlerësuara nga “Trip Advisor”.
Gazeta e nis artikullin: “Klientët janë “zhytur” në karriget e tyre dhe presin me pa durim të shijojnë ushqimin që do të serviret. Miqtë bisedojnë në tryezat e tyre. Restoranti italian ku ata janë ulur mbushet dalë e ngadalë. Jemi në restorantin “Nuovo Mario” dhe është një nga restorantet më të njohura italiane në Berlin. Shumë mendojnë se ushqimi përgatitet nga kuzhinierë italianë, por gabohen!
Restoranti ka si pronar Fatos Xhafollin dhe stafi i tij i ka “rrënjët” shqiptare. Punonjësit në kuzhinë janë nga Shqipëria dhe Kosova. Restorante të tilla me “italianë të rremë”, siç mendojmë se janë, i gjejmë rrallë në Berlin”.
Fatos Xhafolli, shqiptari nga Kosova, para 25 vjetësh ishte prapa banakut, kurse tani është pronari i këtij restoranti. Xhafolli (40-vjeç) ka ardhur nga kryeqyteti i Kosovës, Prishtina, për të punuar si një i huaj, por duke punuar shumë, ka arritur të jetë i suksesshëm në këtë fushë.
Xhafolli nuk është i vetmi shqiptar nga Kosova që ka ngritur një biznes, dhjetëra qindra bashkëkombës të tij kanë ikur në vitin 1990, duke kërkuar strehim dhe punësim në Gjermani.
Xhafolli ka dy dekada që jeton në Berlin të Gjermanisë, ku në këtë qytet ai ka në pronësi tre restorante, në të cilat ka të punësuar 65 punëtorë.
Ai është nënkryetar i rrjetit të Bizneseve të Diasporës Shqiptare në Gjermani. E gjen gjithmonë në krye të detyrës, për të ftuar ata që vijnë në restorantin e tij.
E gjen tek dera e restorantit, duke hapur krahët dhe duke uruar mirëseardhjen me fjalët “Buona Sera”, “Mirëmbrëma”, vështirë se dikush do e kuptojë se është një shqiptar.
Por cili është ai, si i ka ngritur bizneset e tij në Berlin të Gjermanisë, vështirësitë me të cilat ai është ndeshur për të arritur suksesin… Për të lexuar më shumë rreth profilit të sipërmarrësit shqiptar dhe për të njohur më shumë kush është ai, ju ftoj të lexoni artikullin e plotë këtu.
Përshtati: Osman Dedja/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.