Megaoperacioni, 12 milion euro pasuri të sekuestruara / 38 urdhër-arreste nga SPAK, për prokurorë e drejtues policie që bashkëpunuan me dy grupe kriminale

Drogë me vlerë tregu 40 milionë euro, 12 milionë euro prona, automjete e para cash të sekuestruara, si dhe 38 të arrestuar në 4 shtete, mes të cilëve zyrtarë të lartë shqiptarë të organeve ligj zbatuese. Është ky bilanci I deritanishëm I një Super operacioni i trafikut ndërkombëtar të drogës, I koduar “Shpirti” për veprat penale të trafiqeve të lëndëve narkotike, korrupsionit, abuzimit me detyrën dhe pastrimit të parave që po zhvillohet mes SPAK dhe Antimafias Italiane. Operacioni vijon të kryhet ende përfshirë 4 shtete, Italinë, Spanjën Malin e Zi dhe Shqipërinë. Deri tani janë arrestuar Prokurori i Vlorës, Maksim Sota;  Festim Lelaj, ish-nënkomisar i policisë së Vlorës; Saimir Kurti, drejtori i Zyrës së Punës në Kavajë dhe Shefi i Sektorit të Trafiqeve në Drejtorinë e Përgjithshme, Ilir Balla. Mes të arrestuarve gjenden edhe dy pjesëtarë të grupit të shoqërimit të ish Ministrit të Brendshëm Saimir Tahiri. Në konferencën e përbashkët për shtyp me autoritet italiane, Kreu i SPAK Arben Kraja u shpreh se ka patur një shkëmbim të menjëhershëm informacionesh me palën italiane, duke bërë të mundur finalizimin e këtij operacioni. Ai theksoi se u bë e mundur zbulimi i të gjithë hallkave të këtij ‘zinxhiri’ të trafikut të drogës, që nga prodhimi dhe më pas dërgimi në Itali.

Shefi i Antimafias italiane, Federico Cafiero De Raho, përshëndeti bashkëpunimin me SPAK falë të cilit u bë I mundur zhvillimi me sukses i megaoperacionit.

 “Sot është arritja e një objektivi që tregon se si bashkë arrijmë të ndjekim edhe aspekte që lidhen me ‘pabesinë’ e disa institucioneve mbi të cilat vendet tona duhet të tregojnë kujdes të veçantë. Kemi bërë një ndarje konstante të informacionit. Bashkëpunimi ynë Itali-Shqipëri konsiston të forcojmë strukturat që kanë për detyrë të luftojnë krimin e organizuar. Ndaj edhe strukturat duhet të mbështesin. Dua të vlerësoj edhe DIA dhe policinë shqiptare që kanë bërë një detyre të një delikatese të jashtëzakonshme. Është arritur të shkatërrohet një organizatë me një shtrirje ndërkombëtare. Do të vazhdojmë të operojmë së bashku. Arben Kraja me ekipin e tij ka një kapacitet të jashtëzakonshëm në drejtim të hetimit”

Një prej prokurorëve të çështjes, Vladimir Mara, ka dhënë detaje mbi hetimet ku janë përfshirë katër grupe kriminale.

Masat e sigurisë janë dhënë nga Gjyqtari i Gjykatës së Posaçme të Shkallës së Parë për Korrupsionin dhe Krimin e Organizuar, në kuadër te Operacionit SHPIRTI, në lidhje me hetimet e bëra nga muaji Maj 2019 deri në Janar 2021, që kanë bërë të mundur të mblidhen të dhëna të rëndësishme ndaj 38 shtetasve shqiptarë.

Lorenc Rabeta – SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.