Meksika kundër SHBA: Taksa kufitare nuk është ide e mirë, godet energjinë

“Vendosja e një takse kufitare nuk është një ide e mirë për të ardhmen e tregtisë së përbashkët të naftës, gazit dhe nënprodukteve të tjera”, deklaroi zëvendës ministri meksikan i energjisë.

Kjo taksë do të taksonte në teori vetëm importet dhe jo eksportet. Taksa pritet të bëhet pjesë e paketës fiskale që pritet të publikohet në muajt Mars ose Prill, por ende nuk dihet asgjë se kë sektorë do të godasë.

“Ne nuk e shohim këtë si një ide të mirë. Do të kishte efekt në vetë tregun e Shteteve të Bashkuara, dhe do të ndikonte zinxhirin e çmimeve. Kjo nuk është rruga optimale që ne kërkojmë”, deklaroi Aldo Flores.

Gjatë dy dekadave të fundit, të dy fqinjët kanë pasur një tregti intensive në sektorin energjetik. Gjatë vitit të kaluar, vlera totale e eksporteve amerikane të energjisë drejt Meksikës prekte 20 miliardë dollarë, ndërkohë që Meksika eksportoi naftë në vlerën e 8.7 miliardë dollarëve.

“Pozita jonë vijon të jetë ajo në favor të tregtisë së lirë, pasi vetëm në këtë mënyrë mund të përfitojnë të dy vendet, si dhe të forcohet siguria energjetike”, deklaroi zëvendës ministri meksikan.

Roel Korkuti/RTV SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.