Menaxhimi i mbetjeve, 452 milionë euro investime – Tarifë deri në 70 euro për shtëpitë

Shqipëria do të investojë mbi 452 milionë euro gjatë 14 viteve të ardhshme në projektet për menaxhimin e integruar të mbetjeve të ngurta. Shifrat dalin nga një studim i kryer për llogari të bankës gjermane për zhvillim KfW dhe Ministrisë së Infrastrukturës dhe Energjisë.

Raporti grupon investimet e planifikuara për 10 zonat e mbetjeve në Shqipëri, të ndara në tre faza. Vetëm në fazën e parë, nga viti 2018 deri në vitin 2022, planifikohen mbi 219 milionë euro kosto.

Nga investime pothuajse gjysmë-miliardësh, rreth 101 milionë euro do të shkojnë për inceneratorët që kthejnë mbetjen në energji. Rreth 90 milionë euro do të shpenzohen për landfille sanitare, ndërsa 76 milionë euro do të shkojnë drejt rehabilitimit të landfilleve ekzistuese.

Ndarë sipas zonave, kostot më të mëdha i takojnë asaj Tiranë-Durrës, me rreth 196 milionë euro, ku janë planifikuar tre stacione për grumbullimin e përkohshëm të mbetjeve, të destinuara për t’u djegur e kthyer në energji.

Vlera e investimit pritet të mbulohet nga një tarifë shtesë, e cila do të paguhet nga shtëpitë dhe entet tregtare. Kjo tarifë pritet të variojë për secilën zonë, ndërsa pritet të arrijë deri në 70 euro për shtëpi në vit në zonën Tiranë-Durrës.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.