Mënyrat më të këqija për të kursyer para
Ruajtja e një shume të madhe parash është e vështirë, vërtetë. Duke marrë parasysh të gjitha shpenzimet mujore, ruajta e parave tregon se jeni një menaxhues shumë i mirë. Por ndonjëherë mund të ndodhë që mania për të kursyer para të na shtyjë drejt gabimeve e të na groposë më keq.
Janë disa mënyra të cilat mund t’ju bëjnë të mendoni sikur po kurseni por në fakt janë ato të cilat ju zhysin më keq. Hidhini një sy listës së mëposhtme dhe përpiquni të mos bini pre e këtyre gabimeve.
Është e vërtetë që ruajtja e parave është e domosdoshme, sidomos në rast se ju humbisni punën apo keni një problem shëndetësor por ruajtja e parave në mënyrën e gabuar mund t’ju hapë më shumë probleme.
Këto janë mënyrat më të këqija të kursimit të parave:
- Ngrënia e ushqimit të shpejtë për të mos gatuar
Ngrënia e ushqimit të shpejtë vazhdimisht për të mos blerë përbërësit që nevojiten për të gatuar e për të ngrënë një vakt në shtëpi është një nga format më të gabuara për të kursyer para. Dëmi që ushqimi i shpejtë i shkakton shëndetit është aq i madh sa do të harxhoni 3 fishin e lekëve për kurimin tuaj. Kjo nuk është një mënyrë e kursimit të parave.
- Vonesat e pagesave deri sa të merrni rrogën tjetër
Siç e dimë asgjë në këtë vend nuk është falas dhe sigurisht edhe vonesat kanë një kosto të caktuar. Shtyrja e pagesave nuk do t’i zhdukë ato përveç se do t’ju shtojë kamat vonesën. Kështu që kryejini të gjitha pagesat në afatin e duhur dhe më pas shikoni se çfarë mund të kurseni ndonjë gjë.
- Blerja që në fillim të muajit të gjërave shtëpiake
Që në fillim të muajit ju nuk do ta dini asnjëherë se sa do të konsumoni apo si do t’ju shkojë ky muaj dhe mund të ndodhë që shumë ushqime t’ju shkojnë dëm. Mos e bëni këtë gabim, blerjet në supermarket nuk duhet të jenë vetëm njëherë në muaj.
- E ndenjura në shtëpi për të mos harxhuar para
Të rrini në shtëpi dhe të shikoni vetëm televizor me qëllim që të mos dilni të takoni miqtë tuaj se do të harxhoni para nuk është mënyrë kursimi por mënyra se si po largoheni nga njerëzit. Ajo që mund të bëni për të kursyer disa para është të planifikoni daljet tuaja në mënyrë që të mos shpërdoroni para por jo të rrini në shtëpi për këtë arsye.
- Pagimi i minimumit të kartës së kreditit
Kartat e kreditit përmbajnë para të cilat nuk janë tuajat që do të thotë se ju keni para borxh. Nëse ju paguani gjithmonë vetëm minimumin e kartës suaj të kreditit atëherë ju nuk do të arrini kurrë ta shlyeni këtë borxh. Kjo jo vetëm që nuk është mënyrë kursimi por është një nga format më të këqija e cila ju mban përgjithmonë lidhur pa një borxhi.
V.Hydi/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.