Mercedes nën presionin e Ferrarit – Do ta caktojë skuderia Hamilton si pilotin numër një?
Drejtori ekzekutiv i skuderisë Mercedes, Toto Wolff ka folur për nevojën e ekipit për të përcaktuar një strategji për sezonin, pas një analize të thelluar.
Nisja e këtij kampionati ka sjellë dy fitore në tre gara të Vettel dhe Ferrarit, dhe të dy ata renditen para Mercedes e Hamilton në luftën për titull. Dy pilotët kanë krijuar një avantazh prej 23 pikësh me ndjekësin më të afërt Bottas dhe duket se do t’i drejtohen një lufte dyshe për titull.
Kështu lind nevoja e Mercedes të përcaktojë Hamilton si pilotin e saj kryesor dhe ta avantazhojë atë në situata të ndryshme. Por diçka e tillë nuk ka ndodhur kurrë tek skuderia gjermane, pasi filozofia e tyre e garimit e ndalon.
“Nuk na pëlqen kjo gjë. Fare. Nuk është ajo çfarë kemi bërë vitet e fundit”, tha Wolff. “Por situata është ndryshe tani,dhe duhet një analizë për të kuptuar se ku jemi. Do të jetë një vendim i vështirë dhe nuk dua ta diskutoj pasi nuk është e drejtë për Valtteri Bottas”, tha ai.
Vetë piloti është shprehur se të dëgjonte në radio ekipin për t’i hapur rrugë Hamilton ishte ndër gjërat më të vështira që kishte dëgjuar në karrierën e tij si pilot.
“Është e vështirë, sidomos kur përpiqesh të fokusohesh në garën tënde personale. Por unë jam një lojtar ekipi dhe s’mund të them jo”, tha Bottas.
Ferrari dhe Red Bull po e shqetësojnë Mercedesin për herën e parë në katër vjet dhe ky vit ka patur një nisje me konkurrencë të fortë. Gjithsesi Toto tha se është ende shumë herët për të vendosur strategji të tilla.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.