Merkel flet për zgjerimin e 5G: “Duhet një qasje e përbashkët europiane përballë Kinës”
Kancelarja gjermane, Angela Merkel, i bëri thirrje shteteve europiane këtë javë që të bien dakord për një qasje të përbashkët ndaj Kinës dhe prezantimit të gjeneratës së re të rrjeteve 5G. Disa politikëbërës gjerman kërkojnë të përjashtojnë firmën kineze Huawei nga kontratat 5G, pas paralajmërimeve nga Shtetet e Bashkuara se kjo do të mundësojë spiunimin nga Pekini. Huawei ka mohuar akuzat se është lidhur me shtetin kinez. Ndërkohë, kancelarja gjermane, Angela Merkel, preferon standarde të sigurisë që do funksionojnë si barriera në vend të përjashtimit të firmave individuale.
”Unë shoh se një nga rreziqet më të mëdha është se shtetet individuale në Europë duan të kenë politikat e veta përballë Kinës. Kjo do të ishte shkatërruese jo për Kinën, por për Europën. Është e padiskutueshme që ne na duhen standarde të sigurisë së lartë për zgjerimin e rrjeteve 6G, por na duhet ta diskutojmë këtë me partnerët e tjerë europianë.” – ka theksuar kancelarja gjermane, Angela Merkel.
Merkel shtoi se Gjermania dhe Franca duhet të bien në dakordësi fillimisht për një qasje të përbashkët dhe më pas për një zgjidhje në rang europian. Sipas autoriteteve franceze, vendi nuk do të ndjekë Shtetet e Bashkuara dhe të përjashtojë Huawei nga rrjeti i vetë 5G, por do të ketë fuqinë për të shqyrtuar të gjithë prodhuesit e pajisjeve për kërcënime të mundshme të sigurisë.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.