Merkel mbron masat e karantinës: “Populistët që nënvlerësojnë virusin janë të rrezikshëm”

Kancelarja gjermane Angela Merkel, tha se populistët që argumentojnë se koronavirusi nuk të bën gjë, janë të rrezikshëm dhe të papërgjegjshëm, duke mbrojtur masat e reja të karantinës.  “Jemi në një situatë dramatike në nisje të sezonit të të ftohtit, që do na ndikojë të gjithëve pa përjashtim”, – tha Merkel në Bundestag, duke shtuar se masat e reja të karantinës do të reduktojnë kontaktet sociale.  Ndërkohë që zgjedhjet janë më pak se 1 vit larg, Merkel po përpiqet të mbajë gjermanët të bashkuar, pavarësisht rrezikut të një goditjeje të re të ekonomisë më të madhe të Europës.  Ajo tha se populistët që vënë në dyshim seriozitetin e krizës, rrezikojnë jetët e njerëzve.

“Mashtrimet, keqinformimt, teoritë e konspiracionit dhe urrejtja  dëmtojnë jo vetëm debatin demokratik, por edhe luftën me virusin”, -tha Merkel, ndërsa ndërpritej nga deputetët e të djathtës ekstreme, Alternativa për Gjermaninë. Kritikat për masat e fundit të karantinës, kanë ardhur nga sektorët që pritet të goditen më rëndë, përfshirë gastronomia dhe mikpritja. Deputetët e djathtë thonë se këto masa përbëjnë një pengesë historike të lirisë.

“Bombardimi ditor me numrat e të infektuarve synon të frikësojë njerëzit”- tha kryetari i partisë Alexander Gauland. Me shqetësimin e përmbytjes së spitaleve, Merkel lajmëroi këtë javë një karantinë 1 mujore nga data 2 Nëntor, ku do mbyllen restorantet, palestrat dhe teatrot. “Dimri do të jetë i gajtë. Janë katër muaj të gjatë dhe të vështirë, por do të mbarojë”, – tha Merkel.

Klevis Llaha / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.