Merkel prezanton prioritetet e presidencës së BE: “Kapitujt e parë me Shqipërinë dhe Maqedoninë e Veriut të hapen këtë vit”

Kancelarja gjermane, Angela Merkel, gjatë fjalës së mbajtur në Parlamentin Europian deklaroi se liria e fjalës, barazia dhe diversiteti fetar do të jenë thelbësore, gjatë presidencës së Gjermanisë në Këshillin e BE-së. Duke prezantuar prioritetet kryesore të presidencës 6-mujore, Merkel përmendi negociatat me Shqipërinë dhe Maqedoninë e Veriut, përsa i përket zgjerimit të Bashkimit Europian.

Së bashku me Ballkanin Perëndimor, Merkel përmendi edhe Afrikën, luftën kundër dezinformimit, emigracionin, Kinën dhe Rusinë, si prioritetet kryesore të politikës së jashtme të Gjermanisë për gjashtë muajt e ardhshëm. “Bisedimet e pranimit me Shqipërinë dhe Maqedoninë e Veriut duhet të zhvillohen këtë vit dhe kapitujt e parë duhet të hapen”, deklaroi Merkel përpara eurodeputetëve.

Për kancelaren Merkel, fillimi i negociatave me Tiranën dhe Shkupin përcjell një mesazh të rëndësishëm mbi angazhimin e Bashkimit Europian për të plotësuar Europën edhe me Ballkanin Perëndimor. Nëse Shqipëria dhe Maqedonia e Veriut ruajnë kursin aktual të reformave, raundi i parë i negociatave mund të hapet në nëntor ose dhjetor.

Ndërkohë, pas fjalës në parlament, kancelarja Merkel mbajti një konferencë për mediat së bashku me Presidentin e Parlamentit Europian, David Sassoli. “Presidenca e Gjermanisë do të ketë në fokus rindërtimin e Europës. Jemi të sigurt së tani është momenti për të forcuar unionin tonë, i aftë për të përballuar sfidat globale.  Për këtë arsye, u bëj thirrje të gjithëve që të veprojnë me përgjegjësi”, deklaroi Sassoli.

Lidion Kulla / SCAN 

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.