Merr fund emergjenca e furnizimit me energji – Vendimi i qeverisë ishte në fuqi deri në 15 prill, emergjenca u argumentua me krizën globale
Data 15 prill shënon fundin e gjendjes së emergjencës në furnizimin me energji elektrike, të shpallur nga qeveria në fillim të muajit tetor të vitit të kaluar. Vendimi solli pezullimin e planit të investimeve nga kompanitë publike, përveç investimeve të domosdoshme, teksa u argumentua nga qeveria me krizën globale të energjisë dhe çmimet e rritur në bursa.
Vendimi u miratua në një kohë prodhimi vendas i energjisë në Kaskadën e Drinit ra nën mesataren historike të 12 viteve të fundit, pavarësisht situatës së favorshme hidrike. Kjo u konstatua edhe në raportin vjetor të Entit Rregullator të Energjisë, që evidentoi situatën tejet të favorshme në pjesën e parë të vitit dhe përmbysjen e shpejtë të treguesve brenda pak muajsh. Paralelisht, ERE evidentoi se rezerva energjetike në fundin e muajit maj 2021 ishte në nivelin maksimal prej 1520 GWh dhe në fund të muajt gusht kjo rezervë energjetike shkoi në 628 GWh, çka sipas raportit ishte një rënie të ndjeshme dhe të shpejtë.
“Ruajtja dhe menaxhimi i duhur i rezervës hidrike në kaskadën e lumit Drin është një garanci e shtuar për sigurinë energjetike të vendit tone”,-theksohej në raportin e Entit Rregullator të Energjisë. Në këto kushte prodhimi vendas nuk plotësonte dot nevojat konsumatore, duke ekspozuar vendin ndaj importeve të energjisë, që për shkak të çmimeve të larta në tregjet ndërkombëtare i kushtuan financave publike 285.5 mln euro vetëm për periudhën qershor-dhjetor.
Ndërkaq, vendimi i qeverisë për shpalljen e emergjencës në furnizimin me energji u pasua edhe me një tjetër vendim, që transferoi kompetencat për blerjen e energjisë nga Operatori i Shpërndarjes së Energjisë Elektrike, te Korporata Elektroenergjetike Shqiptare, si dhe autorizoi këtë të fundit për të zhvilluar një procedurë për marrjen me qira të një aseti të prodhimit të energjisë termike. Aktualisht, KESH ka deklaruar se ka finalizuar procedurën, që parashikon instalimin e 2 TEC-eve lundrues, që do të pozicionohen në Triport të Vlorës për një periudhë 2-vjeçare.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.