Mesazh nga presidenti në largim – Nishani: Ndihem i nderuar për detyrën që kam kryer

Më 24 korrik, presidenti Bujar Nishani i jep fund mandatit të tij. Nishani, që qëndroi 5 vite në krye të shtetit, ka shkruar një mesazh për qytetarët shqiptarë, duke theksuar se ndihet i kënaqur.

Në mesazhin e bërë publik në faqen e presidencës, Nishani thotë se është kryelartë.

“Kam ndier dhe përballuar përgjegjësinë e rëndë të kryerjes së detyrës së besuar pa neglizhuar asnjë vështirësi, pa u epur përpara asnjë sulmi, pa u lëkundur para asnjë iniciative, pa u penduar para asnjë vendimi”, shkruan Nishani.

Më tej, presidenti shprehet se, është kujdesur për institucionet e pavarura si garante të kolonave mbajtëse të shtetit në shërbim të qytetarit.

Nishani  nuk ka harruar të thotë se, ndoshta ka gjëra që mund të ishin bërë më mirë, por përsosmëria nuk ka fund.

“Nuk bëmë heroizma si nëpër epe dhe balada. U munduam të jemi realistë. Puna dhe kontributet tona ishin thjesht punë dhe kontribut njerëzish të përkushtuar,” përfundoi Nishani.

Më 24 korrik pritet që të betohet president i ri i zgjedhur i Republikës së Shqipërisë, Ilir Meta, i cili u zgjodh me 87 vota pro dhe 2 kundër. Meta do të mbajë postin e presidentit deri në vitin 2022.

Entela Barjamaj/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.