“Mësimi plotësues u ndoq nga 50-60% e nxënësve” – Kushi: Synojmë të evitojmë mësimin online. PD: Shkollat pa kushte, s’kanë ujë
Mësimi plotësues, që u zhvillua gjatë muajit shtator për shkak të problemeve të krijuara nga pandemia e COVID-19 është ndjekur nga 50-60% e nxënësve. Shifrat u bënë me dije nga ministrja e Arsimit, Sportit dhe Rinisë, Evis Kushi gjatë një seance dëgjimore në Komisionin parlamentar të Edukimit dhe Mjeteve të Informimit Publik për masat e marra për fillimin e vitit të ri shkollor.
Ndërkaq, Kushi tha se synohet që të mos ketë rikthim të mësimit online, duke zbatuar 2 skenarët e tjerë të zhvillimit të mësimit në klasa.
Ndërkaq, deputetët e opozitës kritikuan mungesën e ujit në shkolla, në një kohë që zbatimi i kushteve higjieno-sanitare është domosdoshëmri, sidomos në kushtet e pandemisë.
Sipas të dhënave të bëra publike nga Kushi në vitin shkollor 2021-2022 janë regjistruar 773 nxënës më pak, ndërkohë që 21 mijë nxënës zhvillojnë mësim në klasa kolektive. Paralelisht, u bë me dije se niveli i braktisjes së shkollës në arsimin bazë arrin në 0.56%.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.