Mësuesit e edukatorët, shtesë page 5-20% për kualifikimin, 2% për vjetërsinë, 2700-6000 lekë për punën larg vendbanimit e 350 lekë për orët shtesë
Qeveria ka miratuar vendimin për rritjen e pagave për mësuesit në mbarë vendin, ku krahas përqindjes së rritjes sipas kategorive, do të ketë edhe shtesa mbi pagën për kualifikimin apo vjetërsinë në punë.
Nga ky vendim, krahas rritjes mesatare 10 përqind të njoftuar nga qeveria, vendimi përcakton se për mësuesit/edukatorët në arsimin parashkollor, arsimin fillor, arsimin e mesëm të ulët, arsimin e mesëm të lartë dhe atyre në institucionet arsimore për përkudesjen për kategori të veçanta të nxënësve.
Krahas pagës, mësuesit dhe edukatorët do të marrin një shtesë mbi pagën në masën 2 përqind si shtesë për vjetërsi pune, pas çdo viti pune, por jo më shumë se 25 vjet, raporton SCAN.
“Kjo shtesë llogaritet mbi pagën e grupit. Për efekt të llogaritjes së kësaj shtese, vite pune do të konsiderohen vjetërsia e përgjithshme në punë, e dokumentuar në librezën e punës së çdo punonjësi, me përjashtim të viteve të sigurimit vullnetar, vetëpunësimit, shërbimit ushtarak për meshkujt, vitet e shkollimit në institucionet e arsimit të lartë dhe periudha e trajtimit me pagesë papunësie” përcaktohet në vendim.
Po ashtu, krahas pagës e shtesës për vjetërsi pune, mësuesit e edukatorët do të marrin edhe shtesën për kualifikim, që jepet sipas dëshmisë së kualifikimit individual dhe llogaritet mbi pagën e grupit, në përqindje, si më poshtë vijon:
-5% të pagës së grupit, pas përfitimit të shkallës “Mësues i kualifikuar”;
-10% të pagës së grupit, pas përfitimit të shkallës “Mësues specialist”;
-20% të pagës së grupit, pas përfitimit të shkallës “Mësues mjeshtër”.
Po ashtu, krahas pagës, shtesës për vjetërsi pune e shtesës për kualifikim, parashikohet edhe një shtesë tjetër e emërtuar “shtesa e pozicionit”, që është e përcaktuar për çdo vend pune, sipas emërtesës përkatëse të pozicionit të punës.
Po ashtu, përveç pagës, punonjësit mësimorë, që punojnë larg vendbanimit, përfitojnë një kompensim në masën, si më poshtë vijon:
-Kur punojnë brenda rrethit të tyre, jashtë qendrës urbane, por mbi 5 kilometra larg vendbanimit/qendrës së punës dhe kthehen brenda ditës në vendbanimin e tyre, masa e kompensimit është 2 700 (dy mijë e shtatëqind ) lekë në muaj.
-Kur punojnë brenda rrethit të tyre, jashtë qendrës urbane, por mbi 5 kilometra larg vendbanimit/qendrës së punës dhe nuk kthehen brenda ditës në vendbanimin e tyre, masa e kompensimit është 6 000 (gjashtë mijë) lekë në muaj.
Në të dyja rastet, kompensimi për largësi nga vendbanimi nuk aplikohet për periudhën gjatë së cilës punonjësi mësimor kryen pushimet vjetore të pagueshme.
Orët shtesë
Punonjësit mësimorë efektivë, të cilët për nevoja të procesit mësimor japin orë mësimi mbi normën e lejuar mësimore, paguhen për çdo orë mësimore shtesë, si më poshtë vijon:
– Në shkollat e arsimit të mesëm të lartë 350 lekë/për orë;
– Në shkollat e arsimit fillor dhe të mesëm të ulët 275 lekë/për orë.
Punonjësit e jashtëm, të specialiteteve të ndryshme, që japin mësim në shkollat e arsimit të mesëm të lartë, në shkollat teknike e profesionale si dhe në kurset e ndryshme (me përjashtim të kurseve që ngrihen pranë shkollave të larta dhe institucioneve të tjera të kualifikimit të punonjësve mësimorë), për çdo orë mësimore paguhen në të njëjtën masë me punonjësit mësimorë efektivë, si më sipër.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.