Meta, fjalim në asamblenë e OKB: “Objektivi kryesor, integrimi në BE. Pandemia kërkon përgjigje të bashkuar”
Presidenti i Republikës, Ilir Meta ka mbajtur fjalën e radhës në sesionin e 75-të të Asamblesë së Përgjithshme të Kombeve të Bashkuara, që për shkak të pandemisë së Covid-19 është zhvilluar online. Ndër të tjera, në fjalën e tij Meta tha se koronavirusi e ka zhytur botën në një krizë të thellë shëndetësore dhe ekonomike.
“Pasojat socialo-ekonomike me siguri që do të vazhdojnë edhe për shumë vite të tjera, me pasoja të paparashikueshme për paqen dhe sigurinë globale. Mënyra se si do të reagojmë dhe do të përgjigjemi ne, do të përcaktojë se sa shpejt do të rimëkëmbet bota. Pandemia ka theksuar nevojën e njerëzimit për një sistem më të fortë multilateral, bazuar në parimet dhe idealet e mishëruara në Kartën e OKB dhe të drejtën ndërkombëtare”.
Gjithashtu, presidenti shprehu edhe angazhimin e Shqipërisë për të ulur emetimin e karbonit, sipas marrëveshjes së Parisit.
“Shqipëria po punon fort për të arritur synimin global të Kombeve të Bashkuara për të ulur emetimet e gazrave dhe efektin serë me 45% në dekadën e ardhshme, si dhe për të mundësuar zero emetime deri në vitin 2050, në përputhje me Marrëveshjen e Parisit të vitit 2016”.
Përsa i përket integrimit të Shqipërisë në Bashkimin Europian, Presidenti tha se vijon të jetë objektivi kryesor. Sipas tij, integrimi i të gjithë rajonit të Ballkanit Perëndimor do të sjellë paqe dhe prosperitet për të gjithë vendet.
“Anëtarësimi në Bashkimin Evropian vazhdon të jetë objektivi më i rëndësishëm strategjik i Shqipërisë. Jemi plotësisht të vetëdijshëm se na duhet të përmbushim standardet e kërkuara para se të mbahet konferenca e parë ndërqeveritare. Ne e mirëpresim marrëveshjen për normalizimin ekonomik të arritur midis Kosovës dhe Serbisë, e cila u ndërmjetësua dhe u garantua nga Presidenti i Shteteve të Bashkuara, Donald Trump. Mbetemi shpresëplotë se kjo marrëveshje do të injektojë një dinamizëm të ri në marrëdhëniet midis Kosovës dhe Serbisë.
Gjatë fjalës së tij, presidenti kërkoi nga të gjithë shtetet e Asamblesë së Përgjithshme që të mbështesin kandidaturën e Shqipërisë për në Këshillin e Sigurimit të OKB-së për vitet 2022-2023.
Lidion Kulla / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.