Meta mandaton Ramën për të krijuar Qeverinë – Kreu i shtetit nënshkruan dekretin, brenda 10 ditësh emrat e Ministrave votohen në Kuvend
Gjashtë ditë pasi Partia Socialista dërgoi në Presidencë kërkesën për mandatim të Kryeministrit Edi Rama për të formuar Qeverinë e re, ka ardhur edhe dekretimi nga kreu I shtetit. Zyra e Presidentit ka publikuar të premten dokumentin e nënshkruar nga Kreu I Shtetit, ndërkohë që kërkesa zyrtare ishte paraqitur nga Sekretari I Përgjithshëm I Partisë Socialiste Damian Gjinknuri më 4 shtator.
Me mandatimin nga Presidenti, Kryeministri i paraqet për miratim Kuvendit, brenda 10 ditëve, programin qeverisës dhe emrat e ministrave. Pas miratimit në Parlament, kryeministri i dërgon Presidentit për dekretim ministrat, i cili duhet të shprehet brenda 7 ditëve. Dekretet e miratuara nga Presidenti kalohen sërish nga kuvendi në një afat 10 ditë. Para fillimit të detyrës, Kryeministri, zëvendëskryeministri dhe ministrat do të betohen para Presidentit, të cilin e shkarkuan vetëm pak muaj më parë.
Emrat e kabinetit ministror me të cilët mazhoranca do qeverisë përgjatë 4 viteve të ardhshëm u bënë publik nga Kryeministri Edi Rama në mbkedhjen e Asamblesë e Përgjithëshme të Partisë Socialiste mbajtur më 2 shtator.
Edi Rama ka vendosur të rikonfirmojë në postet ministrore afro 80 përqind të kabinetit qeverisës, një kabinet i cili ka numrin më të lartë të grave në portofolet ministrore. 12 nga 16 ministritë do të mbahen nga gra dhe vajza dhe vetëm 4, pa llogaritur vetë Kryeministrin, do të drejtohen nga burra. Në krahun e tij të djathtë, si zv/kryeministër, Rama ka vendosur të mbajë Arben Ahmetaj, i cili do të merret kryesisht me çështjen e Rindërtimit.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.