Meta mbledh KLD-në – Gjyqtarët, shqetësime për procesin e rivlerësimit nga Vetting-u

Shqetësimet e gjyqtarëve lidhur me procesin e Vetting-ut dhe dhuna ndaj grave kanë qenë temat kryesore të mbledhjes së Këshillit të Lartë të Drejtësisë, e para nën drejtimin e Presidentit Ilir Meta. Mbledhja ka zgjatur për rreth 2 orë, ndërsa mungonin tre anëtarë, dy prej të cilëve janë zgjedhur në organet e reja të drejtësisë. Në përfundim Presidenti Ilir Meta deklaroi për mediat se shqetësimet e gjyqtarëve do të bëhen publike, dhe nënvizoi se ka vullnet për të bashkëpunuar me institucionet e reja të drejtësisë që po ngrihen.

“Unë besoj se do të bëhen publike sepse diskutimet në KLD bëhen publike. Natyrisht që ky është një proces plot sfida dhe vullneti është maksimal për të bashkëpunuar me institucionet e reja të vettingut, por edhe me EURALIUS dhe OPDAT që asistojnë në këtë proces. Vullneti për bashkëpunim për të plotësuar të gjitha detyrimet që ka ky institucion deri në krijimin e institucioneve të reja kushtetuese është maksimal edhe në kuadër të përshpejtimit të zbatimit të reformës në drejtësi dhe sidomos zbatimit të ligjit të vettingut, por njëkohësisht edhe në zbatim të sfidave që ka funksionimi i aktual i sistemit gjyqësor, i cili natyrisht ka vështirësitë e veta drejt kalimit në një sistem plotësisht të ri”, tha Meta.

Në fund të takimit të KLD ka folur për mediat edhe gjyqtari Gerd Hoxha, kryetari i Bordit Drejtues të Unionit të Gjyqtarëve. Ai tha se KLD diskutoi për shqetësimin e gjyqtarëve për procesin e rivlerësimit, ndërsa sipas tij shprehu gatishmëri për të dhënë ndihmesën e saj për komisionet.

Lorenc Rabeta/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.