Meta në Sarandë: Në 25 qershor, përkrah LSI të bëhen 1 mln të rinj
Kreu i Kuvendit u ka bërë thirrje të rinjve që mbështesin LSI-në të bëhen 1 milion deri më 25 qershor, në mënyrë që t’i japin një shans të gjithëve. Këtë thirrje Meta e beri gjatë një takimi me banorët e Sarandës, ku u prezantuan kandidatët për deputet të LSI të qarkut Vlorë.
“Forcë e parë, forcë e paparë, kjo është LSI-ja! Vendimi tashmë është marrë: 600 mijë të rinj e të reja në Tiranë dhe në të gjithë Shqipërinë e kanë vendosur LSI-në forcë të parë! U bëj thirrje të gjithë prindërve të tyre që të bëhen 1 milion deri më 25 qershor në mënyrë që t’i japin një shans të gjithëve, në mënyrë që t’i themi jo një herë e përgjithmonë arrogancës, t’i themi jo një herë e përgjithmonë atyre që janë zhytur në vetëkënaqësi nga arroganca dhe egoizmi i tyre dhe kanë harruar hallet dhe problemet e njerëzve të thjeshtë në Saranda në Delvinë, në Konispol dhe në të gjithë Shqipërinë”, u shpreh Kryetari i Kuvendit.
Ndërsa, kandidati për deputet i LSI-së, Sokol Devishaj, u shpreh se programi i LSI-së për zhvillimin e vendit për katër vitet e ardhshme është programi më realist dhe programi me më pak taksa.
“Sot jemi mbledhur për të ndezur motorët drejt fitores së madhe më 25 qershor. LSI-a është një parti politike, por mbi të gjitha një familje e madhe e të gjithë shqiptarëve. Është një familje e rinisë, e prindërve, gjyshërve, një familje që e shoqëron shoqërinë përpara. Ne jemi familja e gjithë shqiptarëve prandaj dhe lista jonë është një listë gjithëpërfshirës. Më datë 25 qershor, numri 1 është i pathyeshëm. Programi ynë për zhvillimin e vendit për katër vitet e ardhshme është programi më realist, është programi më konkret. Programi me më pak taksa”, deklaroi Dervishaj.
Nertila Doko/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.