Meta rrëzon ligjin “për Pronat Shtetërore” Presidenca: Krijon hapësirë për abuzime, bregdeti në duart e një rrethi të ngushtë subjektesh

Presidenti I Republikës ka rikthyer mes akuzash të forta Ligjin për Pronat Shtetërore, nën argumentin se ai u hap rrugën abuzimeve me pasurive të paluajtshme të qytetarëve. Sipas zyrës së Presidentit, Ligji Cenon haptazi parimin kushtetues të shtetit të së drejtës; Cenon parimin e sigurisë juridike në lidhje me ushtrimin e të drejtave të pronësisë me të gjitha tagrat e saj; Cenon parimin e barazisë përpara ligjit; Cenon parimin e lirisë së veprimtarisë ekonomike

Rezervat e Presidentit me “Për pronat e paluajtshme të shtetit”, nisin që me faktin se Projektligji është future në Kuvend me procedurë të përshpejtuar që ka zgjatur vetëm një javë. Por sipas Presidencës, urgjenca as nuk kuptohet e as nuk justifikohet, veçanërisht pa zhvilluar asnjë konsultim paraprak apo vlerësim të thelluar për një çështje kaq sensitive.

Një tjetër pikëpyetje e fortë e ngritur nga Presidenti mbi ndryshimin e konceptit të Bregut të Detit, I cili pa një përcaktim të qartë, krijon mundësinë “që në praktikë të ndodhin abuzime të mëdha ashtu si deri më tani, ku për shkak të ndërhyrjeve dhe interesave të ndryshme, gjerësia dhe shtrirja e asaj që konsiderohet si bregu i detit do të pësonte deformime të mëdha dhe jashtë realitetit, duke krijuar rrezik të shtuar për cenimin e pronës publike”.

Meta akuzon se në thelb Ligji krijon bazën ligjore për shfrytëzimin e pasurisë publike të patjetërsueshme vijë bregetare për interesa private nga një rreth i ngushtë subjektesh, ndërkohë që publiku i gjerë, pikërisht nga këto marrëdhënie juridike që krijohen (kontrata qiraje apo huapërdorje), do të kufizohet në përdorimin e kësaj pasurie.

Për pronat e kaluara në përgjegjësi administrimi enteve qendrore në funksion të së mirës publike, por që sot ushtrojnë të drejtën dhe statusin e pronës shtet, ose shfrytëzimit nga ente private nëpërmjet marrëdhënieve kontraktuale me të drejta, detyrime, dhe me afate të paracaktuara, me këtë ligj krijohet hapësira për t`i kaluar përfundimisht e drejta e administrimit dhe ndryshimit të regjimit pronësor në favor të subjekteve private, argumenton Presidenca, duke I kërkuar deputetëve, të mos e miratojë.

Lorenc Rabeta / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.